Xabar berib o‘tganimizdek, 18-24 iyul kunlari Janubiy Koreyada taekvondo WTF bo‘yicha "Korea Open" reyting musobaqasi bo‘lib o‘tadi. Ushbu musobaqada O‘zbekiston terma jamoasi sharafini 30 nafar sportchi ishtirok etadi.
Bugun musobaqa oldidan bir qancha rasmiy tadbirlar bo‘lib o‘tdi. Unda Laziz Hasanov boshchiligidagi O‘zbekiston taekvondo WTF assosiasiyasi rahbariyati Butunjahon taekvondo federasiyasi prezidenti Cho Chjonvon bilan uchrashib, bir qator muhim masalalar yuzasidan muzokaralar o‘tkazdi. Unda tomonlar jumladan, hamkorlik aloqalarini mustahkamlash, shuningdek, yaqinlashib kelayotgan Osiyo o‘yinlariga o‘zbekistonlik taekvondochilarning ko‘rayotgan tayyorgarligi va yana bir qator masalalar bo‘yicha o‘zaro fikr almashishdi. Fursatdan foydalanib, O‘zbekiston taekvondo assosiasiyasi vakillari Cho Chjonvonni 22-23 sentyabr kunlari Toshkent shahrida bo‘lib o‘tadigan «Elchi kubogi» musobaqasiga taklif etishdi.
Uchrashuv yakunida doktor Cho Chjonvonga O‘zbekiston Milliy olimpiya qo‘mitasi va O‘zbekiston taekvondo assosiasiyasi nomidan esdalik sovg‘asi taqdim etildi. O‘z navbatida, Butunjahon taekvondo federasiyasi rahbari ushbu e’tibordan xursand bo‘ldi.
Ertaga start oladigan turnirda birinchi o‘rinni qo‘lga kiritgan sportchi 20 reyting ochkosiga ega bo‘ladi. Ikkinchi va uchinchi o‘rinni qo‘lga kiritgan sportchilar esa mos ravishda 12 va 8 ochkoni o‘z hisoblariga qo‘shib qo‘yishadi.
