Xabaringiz bor, 18 avgust kuni Indoneziya poytaxti Jakartada XVIII Osiyo o‘yinlari mash’alasi yoqiladi va qit’amizda to‘rt yillikning eng nufuzli musobaqasi rasman boshlanadi.
Qit’a mamlakatlari qatorida O‘zbekiston ham ushbu nufuzli musobaqaga jiddiy tayyorgarlik olib bormoqda. Osiyo o‘yinlarida qit’amizning 45 mamlakatidan 11 300 dan ortiq sportchi ishtirok etishi kutilmoqda. Atletlar sportning 40 turi, 67 yo‘nalishi bo‘yicha g‘oliblik uchun kurash olib boradilar.
Musobaqa startiga 30 kun qolganida Osiyo Olimpiya Kengashi Prezidenti, Milliy olimpiya qo‘mitalari assosiasiyasi rahbari Shayx Ahmad al Faxad al Sabax o‘yinlariga aloqador barchaga minnatdorchilik bildirdib o‘tdi.
«Osiyodagi Milliy Olimpiya qo‘mitalari oilasi nomidan Indoneziya Respublikasi Prezidenti Joko Vidodo, mamlakat vise-prezidenti va Osiyo o‘yinlari boshqaruv qo‘mitasi raisi Yusuf Kalla, shuningdek, Indoneziya Milliy olimpiya qo‘mitasi prezidenti va XVIII yozgi Osiyo o‘yinlari tashkiliy qo‘mitasi rahbari Erik Toxirga qilingan ulkan hajmdagi ish uchun tashakkur izhor qilaman.
Indoneziya Osiyo o‘yinlariga ajoyib tayyorgarlik ko‘rmoqda. Qisqa vaqt ichida yaxshigina muvaffaqiyatga erishdi . Shuningdek, men barcha Milliy olimpiya qo‘mitalari, sportchilar, hamkorlar, OAV xodimlariga minnatdorchilik bildiraman», – dedi Sabax.
Qayd etib o‘tish lozimki, O‘zbekiston sport delegasiyasi Osiyo o‘yinlarida 28 ta sport turida 230 nafardan ortiq sportchi bilan birga ishtirok etishni rejalashtirmoqda. Shuningdek, mamlakatimizdan 100 dan ortiq rasmiy shaxs (murabbiylar, shifokorlar, menejerlar, OAV xodimlari) Jakartadagi o‘yinlar davomida faoliyat olib boradi.
Ma’lumot uchun, Indoneziyadagi Osiyo o‘yinlari butun o‘zbek sporti uchun tarixiy ahamiyat kasb etadi. Zero, milliy sportimiz hisoblangan Kurash ilk marotaba Osiyo o‘yinlari dasturiga aynan Jakartada kiritiladi. Shuningdek, sportning Djiu djitsu, Penchak silat, Sambo va Ot sporti (konkur) kabi turlarida sportchilarimiz birinchi marta Osiyo o‘yinlarida ishtirok etishadi.
