Kecha Hindistonning Nyu-Dehli shahrida sport kurashlari bo‘yicha yoshlar o‘rtasida Osiyo chempionati boshlandi. Unda o‘zbekistonlik yosh polvonlar ham ishtirok etishmoqda.
Bugun musobaqada yunon-rum kurashi bo‘yicha bahslar bo‘lib o‘tdi. Quvonarlisi, unda to‘rt nafar sportchimiz sovrinli o‘rinlarni qo‘lga kiritishga muvaffaq bo‘ldi.
-97kg vazn toifasida yurtimiz sharafini himoya qilgan Temurmirzo Mamajonov barcha raqiblarini mag‘lubiyatga uchratib, oltin medal sohibiga aylandi. -63kg vazn toifasidagi polvonimiz Kamol Qo‘ziyev esa finalgacha yetib borib, kumush medalni qo‘lga kiritdi. Shuningdek, Mahmud Bahshilloyev (-67kg) va To‘rabek Tirkashev (-60kg) bronza medaliga sazovor bo‘ldi.
Musobaqa 22 iyulga qadar davom etadi.
