Hindistonning Nyu-Dehli shahrida sport kurashlari bo‘yicha yoshlar o‘rtasidagi Osiyo chempionati bo‘lib o‘tmoqda.
Unda o‘zbekistonlik sportchilar ham muvaffaqiyatli ishtirok etishmoqda. Bungacha vakillarimiz yunon-rum va ayollar kurashi bo‘yicha medallar qo‘lga kiritishgani haqida xabar bergandik.
Bugun musobaqa doirasida erkin kurash bo‘yicha bahslar bo‘lib o‘tdi. -57kg vazn toifasida yurtimiz sharafini himoya qilayotgan G‘ulomjon Abdullayev Qirg‘iziston va Xitoy vakillarini mag‘lub etib, finalga yo‘l oldi. Hal qiluvchi jangda esa u hindistonlik Navin Navinga qarshi gilamga chiqdi va raqibini mag‘lub etib, oltin medal sohibiga aylandi.
Shuningdek, -79kg vazn toifasidagi Muhammadrasul Rahimov bronza medali uchun jangda Janubiy Koreya vakili Dongmin Shinni mag‘lub etib, sovrindorlar qatoridan joy oldi.
Eslatib o‘tamiz, shu kungacha sportchilarimizdan yunon-rum kurashi bahslarida Temurmirzo Mamajonov (oltin), Kamol Qo‘ziyev (kumush), Mahmud Bahshilloyev (bronza), To‘rabek Tirkashev (bronza), ayollar kurashida esa Nabira Yesenbayeva (kumush) va Bahtigul Baltaniyazova (bronza) sovrindorlar qatoridan joy olgandilar.
