Futbol bo‘yicha O‘zbekiston terma jamoasini argentinalik Ektor Kuper boshqarib boradi. Bu haqda «Xalq so‘zi Online» vaziyatdan xabardor manbalarga tayanib xabar berdi.
Qayd qilinishicha, O‘zbekiston futbol assosiasiyasi argentinalik mutaxassis bilan kelishuvga erishgan. Yaqin soatlar ichida mazkur bitim borasida rasmiy xabar berilishi kutilmoqda.
O‘zbekiston futbol assosiasiyasi, bungacha portugaliyalik Karlush Keyrush va xorvatiyalik Zlatko Dalich nomzodlari bilan ham muzokaralar olib borgan. Biroq ular bilan kelishuvga erishilmagan. Ektor Kuper va O‘FAning o‘zaro manfaatlari bir-biriga mos kelgani aytilmoqda.
Ma’lumot uchun, Ektor Kuperning so‘nggi jamoasi Misr termasi edi. 2015 yilda jamoaga tayinlangan 62 yoshli mutaxassis misrliklar bilan JCH-2018dagi muvaffaqiyatsizlikdan so‘ng iste’foga chiqarilgandi.
Bunga qadar, argentinalik murabbiy Argentinaning «Urakan», «Lanus», Ispaniyaning «Malyorka», «Valensiya», «Real Betis», «Rasing», Italiyaning «Inter», «Parma», Turkiyaning «O‘rduspor», Gresiyaning «Aris», BAAning «Al-Vasl» klublarida, Gruziya (2008-2009) terma jamoasida faoliyat olib borgan.
