UZREPORT axborot agentligi (UZREPORT TV va FUTBOL TV) Italiya A seriyasi va UYEFA Millatlar ligasi musobaqasining O‘zbekiston Respublikasi hududida translyasiya qilish huquqini sotib oldi.
Italiya A seriyasining 2018/19 yilgi mavsum uchrashuvlari 19 avgustdan boshlanadi va 26 mayga qadar davom etadi. Bu yil, A Seriyaga quyi divizion hisoblangan B seriyada g‘olib chiqqan “Empoli” jamoasi va 2-o‘rin sohibi “Parma” qo‘shildi. Shuningdek, o‘tish bahslarida “Palermo”ni mag‘lub etgan “Frozinone” jamoasi ham A seriyada ishtirok etish huquqini qo‘lga kiritdi.
Turinning “Yuventus” jamoasi amaldagi chempion sifatida o‘z unvonini himoya qilishi kerak bo‘ladi. Ammo buning uchun “keksa sinyoralar” tarkibi ancha kuchaygan va o‘z oldiga doim katta maqsadlarni qo‘yadigan “Napoli”, “Roma”, “Inter” va “Milan” kabi jamoalar qarshiligini yengishi zarur.
Jahon futbolining eng kuchli o‘yinchilaridan biri, superyulduz Krishtianu Ronalduning “Real” tarkibidan “Yuventus” jamoasi safiga kelib qo‘shilishi ham turikliklarning chempionlik uchun imkoniyatlarini yanada oshiradi, desak mubolag‘a bo‘lmaydi.
Ko‘pchilik mutaxassislarning fikriga ko‘ra, Ronalduning Italiya A seriyasiga o‘tishi nafaqat “Yuventus”ga xalqaro maydonda g‘alabalarga erishishga, balki butun Italiya futboliga avvalgi nufuzni qaytarishga yordam beradi.
Bizning telekanal yangi mavsumdan boshlab Italiya A seriyasining shiddatli va kurashlarga boy o‘tishi kutilayotgan uchrashuvlarini jonli efirda e’tiboringizga havola qiladi!
UYEFA Millatlar ligasi
UYEFA Millatlar Ligasi Yevropaning milliy terma jamoalari o‘rtasida o‘tkaziladigan yangi xalqaro turnir. Musobaqada UYEFAning 55ta terma jamoasi ishtirok etadi.
Ushbu turnirni o‘tkazish g‘oyasi UYEFAning sobiq prezidenti Mishel Platiniga tegishli. Yangi turnirning asosiy maqsadi milliy terma jamoalar o‘rtasidagi o‘rtoqlik uchrashuvlariga qiziqishni oshirish, shu bilan birga, yangi tijoriy imkoniyatlarni yaratish.
Yangi musobaqaning birinchi mavsumi 2018/19 yillarda bo‘lib o‘tadi. Guruh bosqichi 2018 yil sentyabr-noyabr oylarida, final bosqichi esa 2019 yilning yozida o‘tkaziladi.
Ta’kidlash joizki, ushbu turnirda g‘olib chiqqan terma jamoalarga Yevro-2020ga 4ta yo‘llanma taqdim etiladi, shu bilan birga, an’anaviy saralash o‘yinlariga 20 ta to‘g‘ridan-to‘g‘ri yo‘llanma ham beriladi.
Musobaqa formatiga ko‘ra, barcha 55ta jamoa JCH-2018 yakunlari bo‘yicha reytingdagi o‘rniga qarab 4ta liga bo‘yicha bo‘linadi (A, D, C va D). “A” ligada Yevropaning TOP-12ta terma jamoasi ishtirok etadi. Qolgan 12ta terma jamoa “B” ligaga yo‘l olsa, “S” ligada 15ta terma jamoa, “D” ligada esa 16ta terma jamoa qatnashadi.
Millatlar ligasi musobaqasi ko‘plab muxlislar orasida katta qiziqishga sabab bo‘lmoqda. Bu musobaqadan o‘rin olgan uchrashuvlar joriy mavsumning haqiqiy bezagi bo‘lishiga shubha yo‘q.
UZREPORT TV va FUTBOL TV telekanallarida mavsumning eng qiziqarli musobaqalaridan o‘rin olgan shiddatli uchrashuvlarni jonli efirda tomosha qilib boring!
