Indoneziyadagi Osiyo o‘yinlariga tayyorgarlik qizg‘in davom etmoqda. Milliy olimpiya qo‘mitasi Matbuot va Media departamenti ushbu nufuzli musobaqaga bag‘ishlab "Shohsupa sari yo‘l" loyihasini ishga tushirgan edi. Unda yaqinlashib kelayotgan Osiyo o‘yinlarida yurtimiz sharafini himoya qiluvchi yetakchi sportchilar bilan intervyular tashkil qilinmoqda.
Loyihaning bugungi sonida taekvondo bo‘yicha jahon va Osiyo chempioni, Rio Olimpiadasi ishtirokchisi, Incheondagi Osiyo o‘yinlari kumush medali sohibi Dmitriy Shokin savollarimizga javob qaytaradi.
Maktabdagi taekvondo to‘garagi
Bolaligimda yakkakurash sport turlaridan biri bilan shug‘ullanishni istardim. Birinchi sinf o‘quvchisi bo‘lgan paytim maktabimizda taekvondo bo‘yicha to‘garak ochildi. O‘sha to‘garak ochilgan kundan boshlab taekvondo bilan shug‘ullanib kelyapman. Shuni aytib o‘tishni xohlardimki, sportning ushbu turiga kundan-kunga mehrim ortib bormoqda.
Ortiqcha vazn haqida
Ovqatlanish tartibi haqida gapiradigan bo‘lsam, o‘zimdan xech narsa qizg‘anmayman. +87 kg vazn toifasida musobaqalarda ishtirok etishim sababli, menda ortiqcha vazn masalasida muammo bo‘lmaydi. Xech qachon sun’iy ravishda vaznimni tushirishga urinmaganman. Shu bilan birgalikda, ortiqcha vazn yig‘maslikka harakat qilaman. Chunki ortiqcha vazn jang vaqtida tezlikka ta’sir ko‘rsatadi.
Tarixda qolishni istayman
Sevimli sportchilar va kumirlarim yo‘q. Ammo, maqsadim bor. Bu sport bo‘ladimi, yoki boshqa yo‘nalishmi – tarixda qolishni istayman.
Yodda qoladigan voqealar
Bunday holatlar ko‘p bo‘ladi. 2015 yili Manchesterda bo‘lib o‘tgan Gran-Pri turnirida finalga chiqdim. Mas’uliyatli jang oldidan xotirjam bo‘lish maqsadida chuqur nafas olib, qaytib chiqardim. Ammo, shu vaqt og‘zimdan kapam tushib ketdi va dayan markazigacha dumalab bordi. Shunda nafaqat men, balki zalda yig‘ilganlar ham kulib yuborishdi. Jangga juda yaxshi kayfiyat bilan chiqdim. G‘alabadan so‘ng ota-onamga qo‘ng‘iroq qildim, gaplashdim. Ular internet orqali jangimni onlayn tomosha qilishgandi. Shunda dadam, «Barakalla o‘g‘lim, jangga juda yaxshi kayfiyatda chiqib kelding» dedilar. Keyin ma’lum bo‘lishicha, translyasiya operatorlari kapa og‘zimdan tushib ketgan mahal meni emas, raqibimni ko‘rsatishayotgan ekan. Tushundimki, yaqinlarim meni kayfiyatimni ko‘targan holatni ko‘rmay qolishgan ekan.
Chempion bo‘lish uchun…
Birinchidan, buning uchun sportchida juda kuchli istak bo‘lishi kerak. Ikkinchidan, xech narsaga qaramay o‘z maqsading sari olg‘a intilish lozim. Turli og‘riqlar, qiyinchiliklar, mag‘lubiyatlarga qaramay o‘z ustingda ishlashda davom etish talab etiladi. Murabbiy ko‘rsatmalariga qat’iy amal qilish, mehnat qilishdan to‘xtamaslik kerak. Ahir inson chempion bo‘lib tug‘ilmaydi. Unga mashaqqat bilan erishiladi.
Osiyo o‘yinlari oldidan
Bu men uchun ikkinchi Osiyo o‘yinlari bo‘ladi. Incheondagi musobaqada terma jamoamiz hisobiga oltin medal qo‘shib qo‘yish uchun bir ochko yetmay qolgandi. Yakunda, kumush medal bilan kifoyalangandim. Musobaqaga jiddiy tayyorgarlik ko‘rdik. Bu safar Osiyo o‘yinlarida g‘olib bo‘lish uchun qo‘limdan kelgan barcha ishni qilaman. Bu oilam, terma jamoamiz va vatanimiz uchun juda muhim.
Fursatdan foydalanib, sportchilarimizga birinchi navbatda sog‘lik, kuch va mashg‘ulotlarda sabr tilayman. Osiyo o‘yinlarida g‘alabalarimiz ko‘p bo‘lsin. Olg‘a, O‘zbekiston!
