Namanganning “Navbahor” PFK yangi rahbariyati jamoa muxlislari uchun yana bir xayrli ishga qo‘l urdi. Bu haqda “Navbahor” Matbuot xizmati xabar bermoqda.
 
Ma’lumotga ko‘ra, Superliganing 19-tur doirasidagi “Navbahor” – “Paxtakor” uchrashuvidan boshlab, “lochin”lar o‘z uy o‘yinlarini o‘tkazadigan “Markaziy” o‘yingohga kirish chiptalari arzonlashtirildi.
 
Ya’ni, 30 ming so‘mlik chipta narxlari 20 ming so‘mga tushirildi. Endi “Navbahor” o‘yiniga tushadigan futbol ishqibozlari 4,5, 6, 7, 8,9, 14, 15, 16, 17, 18 va 19 sektorlar uchun 15 ming,  2,3, 10, 11, 12, 13, 20 hamda 21-sektorlar uchun 20 ming so‘mdan chipta xarid qilishlari mumkin.
 
Bundan tashqari, “Navbahor” – “Paxtakor” uchrashuvi uchun chiqarilgan har bir chipta yutuqli hisoblanadi. Muxlislar xarid qilgan chiptalariga ikki dona  Smartfon telefonlari, klub brendi ostidagi futbolkalar, soyabonlar va “Navbahor” jamoasi futbolchilarining imzolari tushirilgan to‘plar yutib olish imkoniyatiga ega bo‘lishadi.
 
Mazkur o‘yinni yaqindagina yakunlangan JCH-2018 turnirida faoliyat yuritgan Osiyo qit’asining eng yetakchi  referilaridan biri, bahraynlik Navaf Shukrulla boshchiligidagi hakamlar brigadasi boshqaradi.
 
“Navbahor” – “Paxtakor” uchrashuvi uchun chiptalar kecha, 26 iyuldan sotuvga chiqdi. Mazkur bahs 28 iyul kuni soat 20:00 da start oladi.
 
““Navbahor” PFKning barcha sa’y-harakatlari muxlislarga yaxshi va qulay shart-sharoitlar yaratishdan iborat. Sevimli jamoangiz -  “Navbahor”ni qo‘llab-quvvatlang hamda  maxsus sovg‘alarga ega bo‘ling!”, deya yozadi klub Matbuot kotibi Ulug‘bek Umarov.