Ayni kunlarda Toshkent shahrida 15 yoshgacha bo‘lgan o‘smirlar o‘rtasida Markaziy Osiyo Futbol Assosiasiyasi tomonidan mintaqa chempionati o‘tkazilmoqda.    Avvalroq, Toshkent U-16 o‘smirlar o‘rtasidagi MOFA chempionatiga ham mezbonlik qilgan va ushbu turnir yuqori saviyada tashkil etilgan edi. Ayni kunlarda esa MOFAga a’zo mamlakatlarning 15 yoshgacha bo‘lgan futbolchilardan iborat terma jamoalari navbatdagi musobaqada g‘oliblik uchun kurash olib borishmoqda.     Nufuzli musobaqani yuqori saviyada tashkil etish tashkilotchilar oldiga qo‘yilgan asosiy maqsadlardan biridir. Shu boisdan bugun musobaqa tashkiliy qo‘mitasi shtabi joylashgan Toshkentdagi Ramada mehmonxonasida tashkiliy qo‘mita hamda musobaqaga jalb etilgan ko‘ngilli volontyorlar ishtirokida uchrashuv bo‘lib o‘tdi. Unda Osiyo Futbol Konfederasiyasi Xalqaro aloqalar departamenti boshlig‘i Vohid Kardani ishtirok etdi va musobaqani yuqori saviyada tashkil etishga hissasini qo‘shayotgan ishchi guruhga OFK nomidan minnatdorchiligini bildirdi.   Har qanday musobaqaning yuqori saviyada o‘tishi avvalo, ushbu musobaqada ishlayotgan tashkiliy qo‘mita hamda volontyorlar mehnatiga bog‘liq. Bugungi kunda dunyoda o‘tkaziladigan har qanday yirik turnir volontyorlarsiz tashkil etilmaydi. Ular musobaqada ishtirok etuvchi jamoalar bilan, rasmiylar va boshqa mehmonlar bilan ishlash, shuningdek, hujjatlar bilan bog‘liq masalalarda tashkiliy qo‘mitaga katta amaliy yordam ko‘rsatishadi. Buni uchrashuvda OFK xalqaro aloqalar departamenti boshlig‘i Vohid Kardani ham ta’kidlab o‘tdi.

“Toshkentda o‘tkazilgan birinchi turnir va ayni kunlarda tashkil etilgan ikkinchi musobaqada ham tashkiliy qo‘mita a’zolari katta hajmdagi ishlarni bajarishmoqda. Ular musobaqaning yaxshi saviyada o‘tishida tinmay mexnat qilishmoqda. OFK hamda shaxsan o‘z nomimdan barchaga, tashkiliy qo‘mita va volontyorlarga minnatdorchilik bildiraman. Ushbu musobaqa yuqori saviyada davom etishiga va muxlis-u mutaxassislarda yanada yaxshiroq taassurot uyg‘otishiga ishonaman”, - dedi Kardani.