“Nasaf” 20-tur uchrashuvini safarda Jizzaxning “So‘g‘diyona” jamoasiga qarshi o‘tkazadi. Uchrashuv 1 avgust chorshanba kuni “So‘g‘diyona” stadionida soat 19:00da boshlanadi.
Pepsi Superliga. 20-tur
“SO‘G‘DIYONA” - “NASAF”
01.08.2018. “So‘g‘diyona” stadioni. 19:00da
Bosh hakam: Akobirxo‘ja Shukurullayev (Toshkent)
Qanot hakamlari: Doniyor Saylavov (Toshkent), Rishat No‘’monov (Toshkent)
Zaxira hakami: Elyor Tursunov (Buxoro)
Nazoratchi: Artyom Arutyunov (Toshkent).
Komissar: Bekzod Aripov.
O‘zaro uchrashuvlarga oid faktlar
Ushbu jamoalar milliy chempionat doirasida bungacha o‘zaro 35 marotaba kuch sinashgan. Shulardan 27ta o‘yinda “ajdarlar”ning qo‘li baland kelgan. 1ta o‘yinda o‘zaro durang qayd etilgan. Ushbu tarixiy durang 1998 yil Qarshida qayd etilgan. 7 uchrashuvda “So‘g‘diyona” jamoasi g‘alaba qozongan. O‘zaro uchrashuvlarda 108 marta darvozalarga gol kiritilgan. To‘plar nisbati bo‘yicha ustunlik “Nasaf” tomonida – 31:77.
Mazkur jamoalar o‘rtasidagi shu yili Qarshida bo‘lib o‘tgan uchrashuvda, “So‘g‘diyona” jamoasi 2:1 hisobida zafar quchgan edi. Ushbu mag‘lubiyat “Nasaf”ning bu yilgi chempionatdagi ilk mag‘lubiyati sifatida tarixga kirdi.
Jizzaxda bo‘lgan o‘zaro uchrashuvlar tarixidan
Mazkur jamoalar Jizzaxda o‘zaro 17ta uchrashuvda maydonga tushishgan. Bu uchrashuvlarda 5 marta “So‘g‘diyona” jamoasining, 12 marta “Nasaf”ning qo‘li baland kelgan.Jamoalar Jizzaxdagi o‘zaro uchrashuvlarda durang qayd etishmagan. Darvozalarga jami 47ta gol kiritilgan. Gollar nisbati bo‘yicha ustunlik “ajdarlar” tomonida – 33:14.
Ushbu jamoalar 1997 yilgi mavsumdan o‘zaro maydonga tushgan bo‘lsalarda, “Nasaf” safardagi ilk g‘alabasini 2000 yilgi mavsumda qo‘lga kiritgan. Bu uchrashuvda “Nasaf” kichik 1:0 hisobida g‘alaba qozongan, uchrashuvdagi golni Rustam Abdullayev kiritgan.
“So‘g‘diyona” jamoasi o‘z maydonida so‘nggi bor “Nasaf”ni 2008 yili mag‘lubiyatga uchratgan.
Jizzaxdagi so‘nggi o‘zaro besh uchrashuv
31.05.2013. “So‘g‘diyona” – “Nasaf” 0:2
03.05.2014. “So‘g‘diyona” – “Nasaf” 1:2
21.10.2015. “So‘g‘diyona” – “Nasaf” 1:2
19.11.2016. “So‘g‘diyona” – “Nasaf” 0:3
26.09.2017. “So‘g‘diyona” – “Nasaf” 0:3
O‘zaro qayd etilgan yirik hisoblar
“Nasaf” jizzaxliklarni eng yirik 4:0 hisobida mag‘lub etgan. “So‘g‘diyona” esa 3:2 yirik hisobidagi g‘alabaga erishgan.
O‘zaro o‘yinlarda “ajdarlar” olti marta yirik hisobda g‘alaba qozongan (3:0 – 2000, 2009, 2016 yil, 4:1 – 2004, 2009, 4:0 - 2017).
Yana bir qiziqarli fakt, ushbu jamoalarning o‘zaro uchrashuvlarda eng “yaxshi ko‘rgan” hisobi - 2:1 yoki 1:2dir. O‘zaro o‘tkazilgan 31 uchrashuvda bu hisob 9 marta takrorlangan.
Murabbiylardan iqtiboslar
O‘zingizga ma’lum, shu yili 1 may kuni “Nasaf” va “So‘g‘diyona” jamoalari Qarshida o‘zaro kuch sinashgan edilar. Uchrashuvda “So‘g‘diyona” jamoasi g‘alaba qozongan edi. O‘yindan so‘ng murabbiylar qanday fikr bildirishgan edi? Quyida iqtiboslar keltiramiz.
Sergey Lushan: - Biz bugun O‘zbekistonning eng kuchli jamoalaridan biri – “Nasaf”ni mag‘lubiyatga uchratdik. “Nasaf” bilan o‘ynash hamisha qiyin, bunga “Bunyodkor” klubida ishlagan paytim ham guvohi bo‘lganman. Bungacha bizning ayrim yosh o‘yinchilarimiz, “Nasaf”ning yetakchi o‘yinchilarini faqat teleekran orqali ko‘rishgan. Bugun ko‘pchilikka bizning futbolchilarimiz vaqtni cho‘zgandek ko‘ringandir. Ammo takror aytaman, “Nasaf”dek jamoaga qarshi o‘ynash oson emas.
Ro‘ziqul Berdiyev: - Bugun mag‘lubiyatga uchradik. Bunga sabab, jamoamizda ruhiy tushkunlik bor. Shuningdek bugungi o‘yinda jismonan tayyormasdek o‘ynadik. Shuni alohida ta’kidlashni istardim hozirgi muammolarimiz o‘z yo‘liga, ammo biz maydonga tushdikmi, g‘alaba uchun harakat qilishimiz kerak. Bizdan muxlislarimiz shuni kutishadi.
Jamoalar navbatdagi o‘zaro uchrashuvga qanday yetib kelishdi?
Bu jamoalar o‘tgan 19-turda mag‘lubiyatga uchrashdi. Har ikkala jamoa mag‘lubiyatini bemalol – alamli bo‘ldi deyish mumkin. Masalan, “Nasaf” o‘z maydonida “AGMK”ni qabul qildi. Dastlabki bo‘limda yaqqol ustunlik qilgan “ajdarlar” ikkinchi bo‘limda o‘z darvozalaridan oson gollarni o‘tkazib yuborishdi. Ya’ni futbolchilari ikkinchi bo‘limda raqibga imkoniyatni berib qo‘ydi.
“So‘g‘diyona” jamoasi safarda “Qo‘qon-912” jamoasining mehmoni bo‘ldi va 2:1 hisobida alamli mag‘lubiyatga uchradi. Jizzaxliklar safarda o‘ynashiga qaramasdan maydon egalari bilan tengma-teng kurash olib borishdi. Uchrashuv durangga mos edi. Ammo ikkinchi bo‘limdagi penalti va u orqali kiritilgan gol, “So‘g‘diyona” jamoasini ancha asabiylashtirib qo‘ydi, natijada ular hisobni tenglashtira olishmadi.
Bu jamoalar quyi oltilikda borishmoqda. “Nasaf” so‘nggi mag‘lubiyat orqali yuqori oltilikdan joy olishini deyarli yo‘qqa chiqardi. “Ajdarlar”ning muvaffaqiyatsizligiga asosiy sabab qilib, qarshiliklarning qator yetakchilar tark etganini va markaziy yarim himoyachi Aziz G‘aniyevning jarohati tufayli jamoasiga yordam bera olmayotganini ko‘rsatish mumkin. Ayni paytda Nasaf“”da barqarorlik yetishmayapti. Bo‘lajak uchrashuv har ikkala jamoa uchun juda muhim sanaladi. Shundan kelib chiqib, bu uchrashuvni murosasiz o‘tishini oldindan taxmin qilish mumkin.
Ushbu jamoalarning o‘rinbosarlari o‘rtasidagi uchrashuv, 31 iyul seshanba kuni “So‘g‘diyona” klubi qarorgohi maydonida soat 17:30da boshlanadi.
