Ispaniya qirollik futbol federasiyasi avvalgi hafta mamlakat milliy jamoasining yangi bosh murabbiyi - Luis Enrikeni ommaga rasman tanishtirdi.
Tadbirdan unumli foydalanishga urinishgan jurnalistlar esa «Barselona»ning sobiq ustoziga savollar bilan «hujum» uyushtirishdi. Lekin Enrike barchaga xotirjam holda javob qaytardi.
JCH-2018dagi omadsizlik haqida
- Ortda qolgan voqealarni obdon tahlil qilishimiz kerak. Shunisi aniq - Lopetegi va Yerro jamoada ajoyib ish olib borishdi. Milliy jamoa mas’ullari va federasiya prezidentidan yetarli ma’lumotlar oldim. Menga «muvaffaqiyatsizlik» iborasi yoqmaydi.
Mundialdagi salbiy natija barchamizni yanada kuchli qiladi, menimcha. Endi qanday ishlashni bilamiz. Lekin inqilob kutmanglar - terma jamoa tarkibi bo‘yicha jiddiy o‘zgarishga qo‘l urmayman. Zero, kimdir 32 yoshida ham barqaror o‘ynaydi, boshqasi esa 30 yoshida faoliyatini yakunlaydi.
Futbolchilar bilan muntazam gaplashishga moyilman. Ha, ular mendan yoshlar. Lekin muloqot - qiziq jarayon. Tabiiyki, ayrim vaziyatlarni o‘zaro muhokama qilamiz. To‘g‘ri, yakuniy qarorni o‘zim chiqaraman. Vazifam - yigitlarga oddiy narsalar - maydonda nima qilishlarini o‘rgatish.
Hozircha hech qaysi futbolchi bilan gaplashmadim. Lekin ishonchim komil, bizda ijrochilar borasida muammolar tug‘ilmaydi. Mana, iqtidorli yoshlar bosh ko‘tarishmoqda. Asosiysi, o‘z uslubimizni o‘zgartirmaymiz.
Ya’ni hujumkor o‘yin va to‘p nazoratiga ko‘proq e’tibor qaratamiz. Jamoada meni va ish prinsiplarimni yaxshi biladigan yigitlar yetarli. Tez orada tarkibni e’lon qilaman. Shunda balki bir qator «syurpriz»larga ham guvoh bo‘larsiz...
OAV bilan muloqot va o‘yin uslubi haqida
- Bizdan ko‘p narsa kutishmoqda. Buni yaxshi tushunaman va professionallikni saqlab qolishga harakat qilaman. Umidvormanki, matbuot bilan ham yaxshi aloqa o‘rnataman. Bu borada hech qachon muammoga uchragan emasman.
O‘yinimizni tobora kuchaytirib, birinchi navbatda, himoyadagi kamchiliklarni bartaraf etishimiz lozim. Bundan tashqari, zaxira o‘rindig‘ini imkon qadar «uzaytirish» kerak. Yana jahon chempionatidagidan farqli o‘laroq, golli vaziyatlarni ko‘proq yaratish ustida ishlash talab etiladi. Umuman, oldingi murabbiylar ham shuni istashgan.
Pike va Inyesta bilan bog‘liq vaziyat haqida
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
