Superliganing 20-turi doirasida "Paxtakor"ga qarshi bahsdan keyin "Lokomotiv" tarkibida uchrashuvning eng yaxshi futbolchisi sifatida qayd etilgan Sadriddin Abdullayev ham o‘z fikrlarini bildirib o‘tdi.

“Chiroyli o‘yin bo‘ldi. Hali hammasi oldinda, chempionlik uchun kurash yanada qattiqroq bo‘ladi. Uchrashuvning boshida charchab qoldik, anchagina qiynaldik. O‘tgan turda "Paxtakor"dan bir kun keyin bahsda qatnashgandik. Umuman olganda, bir kun katta rol o‘ynaydi. Chunki bizning tiklanishimiz hali o‘z maromiga yetmagandi. Keyinchalik sekin-sekin o‘zimizga keldik va o‘yinimizni ham o‘zgartira oldik. To‘g‘risini aytsam, boshqacharoq natija kutgandik.

"Paxtakor" mening yuragimdagi jamoa. Bu yerda tarbiyalanganman. Hozir ham "Paxtakor"ni yaxshi ko‘raman, muxlislik qilaman. Endi esa boshqacha holat. Boshqa jamoa tarkibida o‘ynab, sevimli klubinga qarshi o‘yinda qatnashish - bu futbolning bir bo‘lagi. Barcha natija uchun kurashadi. Chempionlik uchun kurashadigan barcha olti jamoada ham imkoniyat bir hil”, - deydi Sadriddin Abdullayev.