Avvalroq, Farg‘onadagi “Istiqlol” stadionida bo‘lib o‘tgan “Neftchi” – “Navbahor” (2:1) o‘yinida mezbonlarning g‘alaba goliga mualliflik qilgan futbolchi Abdurahmon Abdulhaqov o‘z harakati bilan mehmonlar muxlislarini g‘azablarini keltirishi natijasida namanganlik muxlislar unga baklajka (plastik idish) lar uloqtirgani haqidagi xabar yozgandik.
Ushbu vaziyat yuzasidan O‘zPFL o‘z saytida rasmiy bayonot berdi. Unga ko‘ra, Abdurahmon Abdulhaqov Musobaqalar Reglamentining intizomiy va jarimalar kodeksi 1-qismi 5.4 bandini buzgani uchun “Neftchi” jamoasi futbolchisi Abdurahmon Abdulhaqov 2 million so‘m miqdorida jarimaga tortildi.
“Superliganing 20-tur uchrashuvlari doirasidan o‘rin olgan “Neftchi” – “Navbahor” o‘yini 68-daqiqasida “Neftchi” jamoasi futbolchisi Abdurahmon Abdulhaqov raqib jamoa darvozasini ishg‘ol etganidan so‘ng golni nishonlash maqsadida “Navbahor” jamoasi muxlislari joy olgan sektor tomon harakatlanib, raqib muxlislarini g‘azablantirishga va keskin e’tirozlariga olib kelgan xatti-harakatlarni amalga oshirgan.
Natijada namanganlik muxlislar o‘tirgan sektordan maydon tomon turli xil mayda buyumlar (plastik idishlar) uloqtirilgan.
Namanganning “Navbahor” jamoasi muxlislari “Bunyodkor” hamda “Lokomotiv” klublari maydoniga uyushtirgan safar uchrashuvlari chog‘ida intizom borasida ommaviy ravishda kamchiliklarga yo‘l qo‘ygani mazkur o‘yinlarga tayinlangan uchrashuv komissarlari tomonidan qayd etilgan edi. Superliga 20-tur uchrashuvlari doirasidan o‘rin olgan “Neftchi” – “Navbahor” o‘yinida ham aksariyat namanganlik ishqibozlarning odob-ahloq qoidalari doirasidan chetga chiqish holatlari davom etdi. Jumladan, o‘yinning 68-daqiqasida “Neftchi” jamoasi futbolchisi Abdurahmon Abdulhaqov “Navbahor” darvozasini ishg‘ol etgach, golni “Navbahor” jamoasi muxlislari joy olgan sektor tomon harakatlanib nishonladi. Futbolchi amalga oshirgan xatti-harakatlar 3 mingga yaqin namanganlik muxlislar o‘tirgan sektordagi ko‘p sonli ishqibozlarni ommaviy tarzda g‘azablanishiga va keskin e’tirozlariga olib keldi. Natijada namanganlik muxlislar o‘tirgan sektordan maydon tomon turli xil mayda buyumlar (plastik idishlar) uloqtirildi.
Shu sababdan “Navbahor” futbol klubi muxlislarining xulqi va madaniyati borasida tegishli tartibda ish olib borilmagani uchun “Navbahor” klubi oxirgi marta ogohlantirildi. Agar ushbu holat yana bir bora takrorlansa, klub o‘z uy uchrashuvini muxlislarsiz bo‘sh stadionda o‘tkazishi ham mumkin. Zero stadionlarga futbol ishqibozlari o‘z oilalari, farzandlari bilan birgalikda tashrif buyurayotgan paytda ayrim muxlislarning odob-ahloq me’yorlarini buzayotgani yosh futbolsevarlarga salbiy ta’sir o‘tkazishi mumkin. Bu borada Superliga barcha ishtirokchi jamoalarining muxlislar bilan ishlash bo‘limlari muntazam ish olib borishlari lozim”, deyiladi O‘zPFL xabarida.
