Mamlakat milliy chempionatining 20-turidan keyin futbolchilarga to‘rt kunlik ta’til berilgandi. 6 avgust sanasidan e’tiboran “Metallurg” futbolchilari Superliganing navbatdagi tur uchrashuviga tayyorgarlikni boshlab yuborishdi.
Futbolchilar Qibray o‘quv-mashg‘ulot maskanida mashg‘ulotlarni olib borishmoqda. “Qizilqum” bilan bo‘ladigan o‘yin oldidan “Metallurg”da ba’zi yo‘qotishlar bor. Jamoa hujumchisi Zabixillo O‘rinboyev hamda himoyachimiz Abbosjon Otaxonovlar Indoneziyada o‘tkaziladigan Osiyo o‘yinlarida mamlakatimiz sharafini himoya qilishga safarbar etilgan bo‘lsa, sariq kartochkalarning yig‘ilib qolishi yarim himoyachi Muhammad Isayevning ham bu turda maydonga chiqishiga monelik qiladi. Yana bir yarim himoyachi Suhrob Nurulloyev esa Vyetnamda o‘tkazilayotgan turnirda O‘zbekiston olimpiya terma jamoasi sharafini himoya etmoqda. Tez orada uning safardan qaytib, yig‘inlarga qo‘shilishi kutilyapti. Qolgan barcha futbolchilar bo‘lajak uchrashuvga jiddiy tayyorgarlik olib borishmoqda.
“Metallurg” klub matbuot xizmati.
