“Navbahor” – “Buxoro” uchrashuvidan so‘ng mezbonlar ustozi Ilhom Mo‘minjonov quyidagicha fikr bildirdi:
- Bugungi bahs qiyin bo‘lishini avvaldan bilgan edik. Zero PEPSI Superligada oson o‘yin deyarli yo‘q. Bugun shogirdlarim o‘z o‘yinlarini namoyish etib, yakunda g‘alaba qozona olishdi. Buning uchun ularga tashakkur bildiraman. Bugun bir qator futbolchilarimiz sariq kartochka olishdi. Futbolchi atayin sariq kartochka olish uchun urinmaydi. Shunchaki futbolchilar qiziqqonlik tufayli bugun ogohlantirish ishlab olishdi. Keyingi o‘yinda ularning o‘rni bilinadi, albatta. Lekin umid qilamanki, qolgan yigitlar kartochka tufayli o‘yinni o‘tkazib yuboradigan sheriklari yo‘qligini bilintirishmaydi, - dedi mutaxassis.
