Bir necha yillar avval erkaklar futbolida ayollar ishtirokini tasavvur ham qilib bo‘lmasdi. Biroq hozir millionlar o‘yinini boshqarayotgan ayol-hakamlar, murabbiylar hech kimni ajablantirmayapti.
Qahramonimiz – erkaklar futbolidagi dastlabki professional darvozabon – ayol Stefani Labbening hikoyasi ko‘pchilikni qiziqtirishi turgan gap.
«Sen yigitlar jamoasidagi yagona qizsan. Boz ustiga, taqdir senga o‘ta mas’uliyatli vazifa - darvoza chizig‘ida to‘p surishni ravo ko‘rdi. Ko‘ngilchan murabbiy ko‘rsatma berishni «U bilan muloyimroq bo‘ling!» iborasidan boshlaydi. Talabchan ustoz esa sendan barcha jamoadoshlaring kabi ter to‘kishni talab etadi.
Ha, u haq - kemaga tushganning joni bir. Aks holda, bu «sirk»ning nima keragi bor? Seni hech kim majburlab olib kelgani yo‘q-ku! Shunday ekan, mashqlarni boshidan oxirigacha bajarishing shart. Baquvvat yigitlar tomonidan yo‘llanayotgan kuchli zarbalarni qaytarish lozim. Ish sur’ati o‘ta yuqori. Lekin chidash kerak. Chunki bu kuchliroq, mahoratliroq bo‘lishimni ta’minlaydi.
Mart oyida shunday vaziyatda edim. Meni «Kalgari Futxils» klubiga yuborishdi. Jamoa MLS klublarini yosh iqtidorlar bilan ta’minlashga mas’ul bo‘lgan divizionda qatnashadi. Mashg‘ulot bazasidagi dastlabki kundan keyin menda hayotimdagi eng katta xatoga yo‘l qo‘ydim, degan fikr paydo bo‘ldi. Bunday charchoqni faqat Kanada termasida his etgandim.
Menga bundanda qi-yinroq mashg‘ulot yo‘qdek tuyuldi. Erkaklar jamoasidagi mashqlar bir necha baravar qiyinroq ekaniga amin bo‘ldim. Ochig‘i, o‘zimni nochor zaifadek his etib, rejadan voz kechmoqchi ham bo‘ldim. Lekin ertasiga o‘zimni maydonga tushishga majbur etdim va g‘ayritabiiy kechinmani his etdim: oyoqlarim kuchliroq, qo‘llarim chaqqonroq, fikrlashim teran bo‘lib qolgandi.
Albatta, erkaklar davrasida ojizona harakatlarim sezilib turardi. Ammo o‘zimdagi ijobiy o‘zgarishlarni ich-ichimdan his etardim.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
