Ispaniya chempionatining ilk turida "Barselona" o‘z maydonida "Alaves" jamoasini qabul qildi va yirik hisobda g‘alaba qozondi. Mehmonlar kataloniyaliklarga ancha qarshilik ko‘rsatishdi.

Birinchi bo‘limda Messi tomonidan yo‘llangan jarima zarbasi darvoza to‘siniga tegib qaytdi. Bundan tashqari, "Alaves" darvozaboni Pacheko ko‘p vaziyatlarda seyv namoyish qilib, jamoasini bir necha gollardan qutqarib qoldi.

Biroq ikkinchi bo‘limning 64-daqiqasida Lionel ayyorlik ishlatdi. Jarima maydonchasi tashqarisida belgilangan jarima zarbasini argentinalik futbolchi yerlatib — sakragan jonli devor osti bo‘ylab yo‘lladi. Buni kutmagan darvozabon zarbani qaytara olmadi. Bu gol "Barselona"ning La liga doirasidagi 6000-goli bo‘ldi.

Kataloniyaliklar o‘yin taqdirini ertaroq hal qilib qo‘yishlari mumkin edi. Messining jarima maydonchasi ichida bergan zarbasidan keyin to‘p ustunga tegib qaytdi. Leoning uzatmalaridan keyin Suares va Koutinyo yakkama-yakka vaziyatga chiqib borishdi. Ammo ularning zarbalarini Pacheko qaytarishga muvaffaq bo‘ldi.

Shunga qaramay, o‘yinning so‘nggi daqiqalarda Valverde shogirdlari hisobni yirik ko‘rinishga keltirishdi. Dastlab Koutinyo ikki futbolchini aldab o‘tib, aniq zarba bilan darvozani ishg‘ol qilgan bo‘lsa, qo‘shib berilgan daqiqalarda Suaresning uzatmasidan keyin Messi raqib jarima maydonchasi ichida to‘pni ko‘kragi bilan o‘ziga bo‘ysundirdi, himoyachilarni aldab, Pachekoni dog‘da qoldirdi.

Shu tariqa, "Barselona" yangi mavsumni yirik hisobdagi g‘alaba bilan boshladi va chepmionlik unvonini himoya qilishga kirishdi.

Ispaniya La ligasi, 1-tur
Barselona – Alaves 3:0 (0:0, 3:0)
Gollar: 1:0 – 64 Messi, 2:0 – 83 Koutinyo, 3:0 – 90 Messi.
Barselona – ter Shtegen, Umtiti, Pike, Alba, Serdji Roberto, Rakitich, Buskets (Vidal, 85), Dembele (Artur, 77), Nelson Semedu (Koutinyo, 46), Messi, Suares.
Alaves – Pacheko, Laguardia, Duarte, Agirregabiria, Maripan, Mubarak, Torres (Marin, 68), Manu Garsiya, Xoni Rodriges (Baston, 68), Ibai Gomes, Sobrino (Burgi, 71).
Ogohlantirishlar: Torres (10), Maripan (41).