Indoneziyaning Jakarta hamda Palembang shaharlarida davom etayotgan Osiyo o‘yinlari musobaqasining 4-kungi musobaqalarida o‘zbekistonlik sportchilar ishtiroklarini yakuniga yetkazdilar.
 
Bugun, 22 avgust kuni sportchilar jami 4 ta medalni O‘zbekiston sport delegasiyasi hisobiga qo‘shib qo‘ydilar. Jumladan, taekvandochi Nikita Rafalovich finalda taekvondo vatani hisoblangan Janubiy Koreya vakili Xva Jun Li bilan to‘qnash keldi va 21:18 hisobida g‘alaba qozonib, oltin medal sohibiga aylandi.

 
Og‘ir atletika bo‘yicha Doston Yoqubovda kumush medalni qo‘lga kiritdi. U dast ko‘tarishda 145, siltab ko‘tarishda esa 186 kg toshni o‘ziga bo‘ysundirdi. Umumiy hisobda esa 331 kg natija qayd etdi va ikkinchi bo‘ldi.
 
Yunon-rum kurashi sport turi bo‘yicha Rustam Assakalov finalda eronlik Nuri Hussaynga qarshi jang o‘tkazdi va 1:6 hisobida yutqazdi. Lekin shunday bo‘lsa-da terma jamoamiz uchun yana bir kumush medal naqd qilindi.
 
Yana bir yunon-rum kurashchisi Mo‘minjon Abdullayev bahslar so‘ngida biz uchun yaxshi kayfiyat taqdim etib, eng og‘ir vazn 130 kg toifasida qozog‘istonlik Nurmakan Tinaliyevga qarshi gilamga chiqdi va 8:0 hisobida g‘alaba qozonib, oltin medal sohibiga aylandi.
 
Shu tariqa, o‘zbekistonlik sportchilarning Osiyo o‘yinlari musobaqasining 4-kun chiqishlari yakuniga yetdi.
 
Delegasiya 4-kun natijalariga ko‘ra, jami 14 medal bilan umumjamoa hisobida 9-o‘rinni egallab turibdi. Ro‘yxatning kuchli uchligiga Xitoy (umumjamoa hisobida 82 ta), Yaponiya (68 ta) va Janubiy Koreya (49 ta) terma jamoalari joylashgan.