Moskvaning "Lokomotiv" klubidan Samaraning "Krilya Sovetov" jamoasiga ijara huquqi asosida o‘tgan himoyachi Vitaliy Denisov yangi jamoasi safida yuqori natijalar qayd etish niyatida ekanini aytib o‘tdi. Bu haqda samaraliklar matbuot xizmati xabar bermoqda.
«Birinchi mashg‘ulotda qatnashdim. Ertalab uchib kelgandim, yarim tun davomida uxlaganim yo‘q. Shu boisdan hozircha to‘la tetik holatda emasman. Tez orada jamoaga kirishib ketaman, degan umiddaman.
Jahon chempionati munosabati bilan yangi "Samara Arena" stadioni qurilganidan xursandman. Buni qayd etmasdan ilojim yo‘q. A’lo darajadagi stadion bo‘libdi, rosa chiroyli. Avvalgi holati bilan taqqoslaganda farq juda sezilarli. Bu shahar, jamoa va muxlislar uchun anchagina ijobiy holat. Muhitning bunday ekani yoqimli bo‘ladi. O‘z ovozingni eshitib o‘ynagandan ko‘ra, tribunalar to‘la stadionda to‘p surish maroqliroq.
Vatandoshlarimning meni qo‘llab-quvvatlashidan xursandman. Qayerga bormay, bir yoki ikki nafar inson bayroq bilan yo‘limdan chiqadi. Buni qanday qilishlarini bilmayman.
Jamoaning yuqori marralarga erishishiga yordam berish uchun bor kuchim bilan harakat qilaman», - dedi o‘zbekistonlik himoyachi.
Yaqinda Vitaliy temiryo‘lchilar bilan 2019 yil yozigacha mo‘ljallangan yangi shartnoma imzolagan va buning uchun maoshining qisqarishiga ham rozi bo‘lgan edi. Tajribali himoyachi Lokomotiv» safiga 2013 yili qo‘shilgan. Kelishuvga ko‘ra, u "Krilya Sovetov"da bir mavsum davomida to‘p suradi.
Eslatib o‘tamiz, 31 yoshli Denisov O‘zbekiston terma jamoasining Ektor Kuper murabbiyligidagi ilk yig‘iniga jalb etilgan.
