Москванинг "Локомотив" клубидан Самаранинг "Крилья Советов" жамоасига ижара ҳуқуқи асосида ўтган ҳимоячи Виталий Денисов янги жамоаси сафида юқори натижалар қайд этиш ниятида эканини айтиб ўтди. Бу ҳақда самараликлар матбуот хизмати хабар бермоқда.
«Биринчи машғулотда қатнашдим. Эрталаб учиб келгандим, ярим тун давомида ухлаганим йўқ. Шу боисдан ҳозирча тўла тетик ҳолатда эмасман. Тез орада жамоага киришиб кетаман, деган умиддаман.
Жаҳон чемпионати муносабати билан янги "Самара Арена" стадиони қурилганидан хурсандман. Буни қайд этмасдан иложим йўқ. Аъло даражадаги стадион бўлибди, роса чиройли. Аввалги ҳолати билан таққослаганда фарқ жуда сезиларли. Бу шаҳар, жамоа ва мухлислар учун анчагина ижобий ҳолат. Муҳитнинг бундай экани ёқимли бўлади. Ўз овозингни эшитиб ўйнагандан кўра, трибуналар тўла стадионда тўп суриш мароқлироқ.
Ватандошларимнинг мени қўллаб-қувватлашидан хурсандман. Қаерга бормай, бир ёки икки нафар инсон байроқ билан йўлимдан чиқади. Буни қандай қилишларини билмайман.
Жамоанинг юқори марраларга эришишига ёрдам бериш учун бор кучим билан ҳаракат қиламан», - деди ўзбекистонлик ҳимоячи.
Яқинда Виталий темирйўлчилар билан 2019 йил ёзигача мўлжалланган янги шартнома имзолаган ва бунинг учун маошининг қисқаришига ҳам рози бўлган эди. Тажрибали ҳимоячи Локомотив» сафига 2013 йили қўшилган. Келишувга кўра, у "Крилья Советов"да бир мавсум давомида тўп суради.
Эслатиб ўтамиз, 31 ёшли Денисов Ўзбекистон терма жамоасининг Эктор Купер мураббийлигидаги илк йиғинига жалб этилган.
