Bugun Indoneziyaning Jakarta va Palembang shaharlarida o‘tkazilayotgan Osiyo o‘yinlarining oltinchi kun bellashuvlari bo‘lib o‘tdi.

Unda o‘zbekistonlik sportchilar ikkita kumush medalni terma jamoamiz hisobiga qo‘shib qo‘yishdi.

Kunning birinchi kumush medalini akademik eshkak eshish bahslarida sakkiz kishilik ekipajimiz qo‘lga kiritdi. Alisher Yarov, Dostonjon Baxriyev, Islam Mambetnazarov, Dostonjon Xursanov, Shohjahon Najmiyev, Otamurod Rahimov, Shehroz Hakimov, Zafar Usmonov hamda Anatoliy Krasnovlardan tashkil topgan jamoamiz 6:12.46 natija bilan marraga ikkinchi bo‘lib yetib borishdi va kumush medalga sazovor bo‘lishdi.

So‘ngra velosportning shosse yo‘nalishida 40km masofaga bo‘lib o‘tgan bellashuvda ishtirok etgan Murod Xolmurodov 57:10.52 natija bilan ikkinchi o‘rinni egalladi va yana bir kumush medalga ega chiqdi.

Shu tariqa, oltinchi kun yakunlariga ko‘ra O‘zbekiston sport delegasiyasining medallari soni 21taga yetgan. Hamyurtlarimiz shu kungacha 4ta oltin, 10ta kumush va 7ta bronza medallarini qo‘lga kiritganlar.