Indoneziyaning Jakarta va Palembang shaharlarida bo‘lib o‘tayotgan Osiyo O‘yinlarining navbatdagi o‘n birinchi kunida o‘zbekistonlik sportchilar uchun omadli boshlandi.

Dzyudoning erkaklar o‘rtasidagi eng yengil — 60 kg. vazn toifasida ishtirok etgan Diyorbek O‘rozboyev chempionlikni qo‘lga kiritdi. Hamyurtimiz dastlab hindistonlik Vijay Kumar Yadavni 1:47 daqiqada "ippon" bilan mag‘lub etdi. Chorak finalda taypeylik Yang Yung Veyga qarshi jang qiyinroq kechdi. Avvaliga raqib dzyudochisi "vazari" ishlagan bo‘lsa, oradan ko‘p o‘tmasdan Diyorbek shunday baho bilan hisobni tenglashtirdi. Bellashuv tugashiga yarim daqiqa qolganida vatandoshimiz yana bir "vazari" ishladi va jangni muddatidan avval g‘alaba bilan yakunladi.

Yarim final jangi yanada qiyin kechdi. Bahsning asosiy vaqtida hisob ochilmagan bo‘lsa, "golden score"da O‘rozboyev o‘z uslubida "vazari" ishladi va finalga yo‘l oldi. Yaponiyalik Toru Shishimega qarshi bellashuv ham shunga o‘xshash bo‘ldi. To‘rt daqiqalik asosiy vaqtda hisob ochilmagach, qo‘shimcha bo‘limlarda Diyorbek yana bir shunday uslub bilan raqibining bir yelkasini gilamga tegizdi. G‘alaba! Oltin medal!

Ushbu "oltin" tufayli O‘zbekiston delegasiyasining yuqori probali medallar soni 10taga yetdi va jadvalda Hindistondan o‘tib ketib, 8-o‘ringa  ko‘tarilib oldi.