Indoneziyaning Jakarta va Palembang shaharlarida XVIII Osiyo o‘yinlari qizg‘in davom etmoqda. Shu kungacha o‘yinlarning o‘n bir kuni ortda qoldi. Hamyurtlarimiz musobaqalarda muvaffaqiyatli ishtirok etib kelishmoqda.

Sir emaski, Osiyo o‘yinarida milliy sportimiz hisoblangan kurash bo‘yicha bellashuvlar ilk marotaba tashkil etildi. Unda ishtirok etayotgan o‘zbekistonlik sportchilar ikki kun ichida to‘qqizta medal, jumladan 4ta oltin, 1ta kumush va 4ta bronza medallariga ega chiqishdi. Ertangi kun bahslarida yana 2ta vazn toifasida 4 nafar polvonimiz medallar uchun kurash olib borishadi.

Shuningdek, bokschilarimiz ham yo‘qotishlarsiz sovrinli o‘rinlar uchun kurashni davom ettirishmoqda. Bugun yakunlangan chorak final janglaridan so‘ng charm qo‘lqop ustalarimizning barchasi shohsupadan o‘rin egallashi aniq bo‘ldi.

Qolaversa, bugun dzyudochilarimiz Osiyo o‘yinlaridagi ishtiroklarini muvaffaqiyatli boshlashdi. Diyorbek O‘rozboyev dzyudo bo‘yicha bahslarning oltin medaliga sazovor bo‘ldi.

O‘z navbatida Milliy olimpiya qo‘mitasi yuqorida qayd etilgan sport turlarida yurtimiz sharafini himoya qiladigan hamyurtlarimizni ruhlantirish, ularning kayfiyatini ko‘tarish maqsadida maxsus tayyorlangan eksklyuziv soatlarni ularga taqdim etdi. O‘z navbatida maxsus qo‘l soatlari sportchilarimizga manzur keldi.

Eslatib o‘tamiz, Osiyo o‘yinlarining 11 kuni yakunlariga ko‘ra, o‘zbekistonlik sportchilar 45ta medalga ega bo‘lib turishibdi. Oldinda yana uch kun borligini hisobga oladigan bo‘lsak, ushbu son yanada ortishi aniq.