Indoneziyaning Jakarta va Palembang shaharlarida Osiyo o‘yinlarining 13-kuni nihoyasiga yetdi.
Kecha musobaqada O‘zbekiston sport delegasiyasining Osiyo o‘yinlaridagi medallar sifati bo‘yicha rekordi yangilangandi.
Bugun terma jamoamizning medallar jamg‘arish bo‘yicha yangi rekordi o‘rnatildi. Shu kungacha bu borada yurtdoshlarimizning eng yaxshi ko‘rsatkichi 2010 yili Guanchjou shahrida qayd etilgandi. O‘sha yili o‘zbek sportchilari 56 ta medal bilan yurtimizga qaytgandilar. Indoneziyadagi Osiyo o‘yinlari yakunlanishiga ikki kun qolganida ushbu rekord ham yangilandi. Bugun vakillarimiz 57-medalni terma jamoamiz hisobiga qo‘shib qo‘yishdi. Bu mustaqil O‘zbekiston uchun Osiyo o‘yinlaridagi eng yaxshi natija hisoblanadi.
Ammo bu hali hammasi emas. Ertaga, musobaqaning so‘nggi kunida yetti nafar bokschimiz final bahsida oltin medallar uchun ringga ko‘tariladi. Musobaqada ishtirok etayotgan bokschilarimizning barchasi hal qiluvchi final bosqichiga yetib kelishdi. Ulardan ham oltin medallarni kutib qolamiz. Shuningdek, baydarka va kanoeda eshkak eshuvchilarimiz final bahslarida ishtirok etishadi. Mazkur yo‘nalishda yurtimiz sharafini himoya qiluvchi sportchilarimizdan ham umidimiz katta. Shunday ekan, bayram davom etadi.
