Bugun, 31 avgust kuni Indoneziyada davom etayotgan Osiyo o‘yinlari musobaqasining o‘n uchinchi kunida o‘zbekistonlik sportchilar jami 4 ta bronza medal qo‘lga kiritishdi. Oltin yoki kumush medallar bugun kuzatilmadi. 

Dzyudo bo‘yicha Sherali Jo‘rayev bronza medali uchun o‘tkazilgan bahsda BAA vakili Ivan Remarenkoni mag‘lub etdi va sovrindorlar qatoridan joy oldi. 

Yana bir dzyudochi Bekmurod Oltiboyev bronza medali uchun jangda eronlik Javod Mahjub ustidan g‘alaba qozonib, navbatdagi bronza medalga ega chiqdi. 

Sambo bo‘yicha ham xuddi shuncha medal delegasiya hisobiga qo‘shildi.

Nodira Gulova bronza uchun bahsda boshqa bir sportchimiz Madina Turg‘unboyevani mag‘lub etib, medalga sazovor bo‘ldi. Erkak sambochi Ahmad Rahmatilloyev tojikistonlik raqibidan ustun kelib, bronza egasiga aylandi. 

Ammo bugun yarim final bosqichida jang o‘tkazgan barcha bokschilar ertaga musobaqa finalida ringga ko‘tariladilar. Bokschilardan faqat oltin medallar kutamiz.

Shu tariqa, O‘zbekiston sport delegasiyasi hisobiga Osiyo o‘yinlaridagi o‘n uchinchi kunida 4 ta bronza medal “+” qilindi. Umumiy medallar soni 57 taga yetdi. Ularning 15 tasi oltin, 19 tasi kumush va yana 23 tasi bronza hisoblanadi. Sport terma jamoamiz umumiy ro‘yxatda bir pog‘ona pastlab, 7-o‘rinni band etdi. 

Ro‘yxatning kuchli uchligini yana Xitoy (263 ta medal umujamoa hisobida), Yaponiya (189) va Janubiy Koreya (160) band etdi.