Osiyo o‘yinlarida sambo bo‘yicha erkaklar 90, ayollar 68 kg. vazn toifasida bahslarda ishtirok etishmoqda. Quvonarli tomoni, har ikkala vaznda ikki dzyudochi finalga chiqishga muvaffaq bo‘ldi.

Ayollar, -68 kg.

Nilufar Davletova saralash bosqichilarida livanlik va tailandlik raqiblarini mag‘lub etgan bo‘lsa, chorak finalda indoneziyalik sportchi dog‘da qoldirildi. Hamyurtimiz yarim final bahsida qozog‘istonlik raqibi Dinara Kudarovani 4-0 hosobda mag‘lubiyatga uchratib, final yo‘llanmasini qo‘lga kiritdi. Uning finaldagi raqibi yana bir qozog‘istonlik sambochi Kurishbayeva Dildash bo‘ladi. Final jangi Toshkent vaqti bilan 14:24 da boshlanishi rejalashtirilgan!

Mazkur vaznda ishtirok etgan yana bir o‘zbekistonlik sportchi Ismatova Gulmira dastlabki bosqichda suriyalik raqibdan o‘tgan bo‘lsa, chorak finalda mo‘g‘ul sambochisiga yutqazib qo‘ydi. Bronza medal uchun kechgan bahslarda Gulmira bir raqibini yengdi, ammo ikkinchisida mag‘lub bo‘ldi.


Erkaklar. -90 kg.

Xuddi shunday erkaklar o‘rtasida -90 kg vazn toifasida o‘tkazilayotgan bahslarda yana bir sportchimiz final jangiga yo‘llanmani qo‘lga kiritdi. Xolmatov Kamolliddin saralash bosqichida yaponiyalik sportchini, chorak finalda eronlik sambochini mag‘lubiyatga uchratdi. Vatandoshimiz yarim finalda tojikistonlik Komronshoh Ustopiriyonni 3:0 hisobida mag‘lub etdi. Uning finaldagi raqibi tojikistonlik Umed Xasanbekov bo‘ladi.

Mazkur vaznda ishtirok etgan yana bir o‘zbekistonlik sambochi Ne’mat Yoqubov saralashda qirg‘izistonlik sportchidan o‘tib, chorak finalda Qozog‘iston vakiliga imkoniyat berdi. Shuningdek, bronza medali uchun o‘tish bahsi ham Ne’mat uchun omadsiz chiqdi.