Superliga birinchi bosqich bahslari yakuniga yetdi va endilikda jamoalar 6 tadan 2 guruxga bo‘lingan holda bahslarni davom ettiradi.

“So‘g‘diyona” jamoasi futbolchisi Shoxruz Norxonov birinchi bosqich yakunlari va jamoasi ikkinchi bosqichga qanday tayyorgarlik ko‘rayotgani haqida o‘z fikrlari bilan o‘rtoqlashdi.

- Ilgari 16 ta jamoalar bilan kuch sinashar edik. Bu yil esa Superligada 12 ta kuchli jamoa qolgan va ularning 2 ta kuchli 6 talikka ajrilishi jamoalar o‘rtasida raqobatni kuchaytirdi. Menimcha hozirgi chempionat formati o‘tgan yilgidan ancha qiziqarli tus oldi.

Chempionat boshida har bir ochko uchun jon-jahdimiz bilan kurashdik. Lekin bu – futbol. Hozir 11-o‘rinda bo‘lsak-da, oldinda hali 10 ta o‘yin bor. Biz ulardan foydalanib 7,8-o‘rinlar uchun kurashamiz.

Aslida chempionat boshida kuchli 6 talikka kirishni maqsad qilgan edik. Har bir jamoa ochkolar uchun kurashdi. Birinchi bosqichda qila olmagan ishlarimizni endi ikkinchi bosqichda uddalaymiz, degan umiddaman. O‘yda ham, safar o‘yinlarida ham faqat g‘alaba uchun kurashib, rahbariyatimiz va muxlislarni xursand qilishga harakat qilamiz. Maqsadmiz hozirgi holatmizdan yuqorilash va uddalay olmagan ishlarimizni ikkinchi bosqichda uddalash.

Qur’a tashlanganidan so‘ng raqiblarni bilib oldik va hozir asosiy vazifamiz 13 sentyabrda o‘tkaziladigan “Qizilqum”ga qarshi bahsga jiddiy hozirlik ko‘rishdir. Maqsadimiz – “Qizilqum”ni mag‘lub etish. Ikkinchi bosqichni birinchi o‘yindanoqg‘alaba bilan boshlashni maqsad qilyapmiz.

Shu fursatdan foydalanib, jamoamiz nomidan O‘zbekiston Respublikasining 27 yillik Mustaqillik bayrami bilan yurtdoshlarmizni muborakbod etaman. Hammani xonadoniga tinchlik-totuvlik, baxt-omad tilaymiz. Ikkinchi bosqichda barcha jamoalarga omad tilayman, - dedi mahoratli futbolchi.