Ispaniya chempionatining 3-turi doirasida "Barselona" klubi o‘z maydonida "Ueska"ni qabul qildi.

Liga debyutanti uchrashuvning 3-daqiqasidayoq raqib darvozasini ishg‘ol qilib, mezbonlarning jahlini chiqarib yubordi. Dastlab Messi birgina fint orqali raqibning butun himoya chizig‘ini dog‘da qoldirdi va o‘ng oyoqda zarba berib, hisobni tenglashtirdi. Oradan ko‘p o‘tmasdan Albaning uzatmasini "Ueska" himoyachisi o‘z darvozasiga burib yubordi. Bo‘lim so‘ngida Luis Suares "Barsa"ning uchinchi golini urgan bo‘lsa, tanaffus arafasida mehmonlar hisobni 3:2 ko‘rinishga keltirib qo‘yishdi.

Tanaffusdan keyin esa debyutant jamoa kataloniyaliklarga hech qanday qarshilik ko‘rsata olmadi. Natijada "ko‘k-anorranglilar" ikkinchi bo‘limda yana beshta gol urishdi va hisobni 8:2 ko‘rinishga keltirishdi. Messi va Suares dublni rasmiylashtirishgan bo‘lsa, Dembele, Rakitich va Alba o‘z hisobiga bittadan gol yozib qo‘yishdi.

Mazkur yirik hisobdagi g‘alabadan so‘ng "Barselona" o‘z ochkolarini 9taga yetkazdi hamda to‘plar nisbatiga ko‘ra jadvalda 1-o‘ringa ko‘tarilib oldi.

Ispaniya La ligasi, 3-tur
"BARSELONA" - "UESKA" 8:2 (3:2)
Gollar: 0:1 – 3 Ernandes, 1:1 – 16 Messi, 2:1 – 24, avtogol Pulido, 3:1 – 39 Suares, 3:2 – 42 Aleks Galyar, 4:2 – 48 Dembele, 5:2 – 52 Rakitich, 6:2 – 61 Messi, 7:2 – 81 Alba, 8:2 – 90, penalti Suares.
Barselona – ter Shtegen, Pike, Alba, Serji Roberto, Umtiti (Langle, 65), Rakitich (Vidal, 71), Buskets (Artur, 76), Koutinyo, Dembele, Messi, Suares.
Ueska – Verner, Pulido, Luizinyu, Miramon, Echeyta, Melero, Musto, Gomes, Aleks Galyar (Ruben Semedu, 65), Longo (Gyurler, 58), Ernandes (Avila, 72).
Ogohlantirishlar: Luizinyu (26), Musto (87), Vidal (88).