Испания чемпионатининг 3-тури доирасида "Барселона" клуби ўз майдонида "Уэска"ни қабул қилди.

Лига дебютанти учрашувнинг 3-дақиқасидаёқ рақиб дарвозасини ишғол қилиб, мезбонларнинг жаҳлини чиқариб юборди. Дастлаб Месси биргина финт орқали рақибнинг бутун ҳимоя чизиғини доғда қолдирди ва ўнг оёқда зарба бериб, ҳисобни тенглаштирди. Орадан кўп ўтмасдан Альбанинг узатмасини "Уэска" ҳимоячиси ўз дарвозасига буриб юборди. Бўлим сўнгида Луис Суарес "Барса"нинг учинчи голини урган бўлса, танаффус арафасида меҳмонлар ҳисобни 3:2 кўринишга келтириб қўйишди.

Танаффусдан кейин эса дебютант жамоа каталонияликларга ҳеч қандай қаршилик кўрсата олмади. Натижада "кўк-анорранглилар" иккинчи бўлимда яна бешта гол уришди ва ҳисобни 8:2 кўринишга келтиришди. Месси ва Суарес дублни расмийлаштиришган бўлса, Дембеле, Ракитич ва Альба ўз ҳисобига биттадан гол ёзиб қўйишди.

Мазкур йирик ҳисобдаги ғалабадан сўнг "Барселона" ўз очколарини 9тага етказди ҳамда тўплар нисбатига кўра жадвалда 1-ўринга кўтарилиб олди.

Испания Ла лигаси, 3-тур
"БАРСЕЛОНА" - "УЭСКА" 8:2 (3:2)
Голлар: 0:1 – 3 Эрнандес, 1:1 – 16 Месси, 2:1 – 24, автогол Пулидо, 3:1 – 39 Суарес, 3:2 – 42 Алекс Гальяр, 4:2 – 48 Дембеле, 5:2 – 52 Ракитич, 6:2 – 61 Месси, 7:2 – 81 Альба, 8:2 – 90, пенальти Суарес.
Барселона – тер Штеген, Пике, Альба, Сержи Роберто, Умтити (Лангле, 65), Ракитич (Видаль, 71), Бускетс (Артур, 76), Коутиньо, Дембеле, Месси, Суарес.
Уэска – Вернер, Пулидо, Луизинью, Мирамон, Эчейта, Мелеро, Мусто, Гомес, Алекс Гальяр (Рубен Семеду, 65), Лонго (Гюрлер, 58), Эрнандес (Авила, 72).
Огоҳлантиришлар: Луизинью (26), Мусто (87), Видаль (88).