Xalqaro qilichbozlik federasiyasi sentyabr oyining ikkinchi shanbasini Butunjahon qilichbozlik kuni sifatida e’lon qilgan. Ushbu sanani nishonlashdan ko‘zlangan asosiy maqsad Olimpiya sport turi hisoblangan qilichbozlikni aholi orasida keng targ‘ib qilish va ommalashtirishdir. Butunjahon qilichbozlik kuni bu yil 8 sentyabr kuniga to‘g‘ri kelmoqda.
Ushbu bayram «Sport barcha uchun» shiori ostida tashkil qilinadi. Yig‘ilganlarga Qilichbozlikning turli yo‘nalishlari bo‘yicha chiqishlar, sportning ushbu turi go‘zalligi namoyish etib beriladi.
O‘zbekistonda ham bu kunni keng miqyosda nishonlash rejalashtirilmoqda. Bugun, 6 sentyabr kuni soat 18:00da Toshkent shahridagi «Ashhobod» bog‘ida Butunjahon qilichbozlik kuni nishonlanadi. Ushbu sport bayramida O‘zbekiston qilichbozlik federasiyasining 200 nafardan ziyod vakili ishtirok etishi kutilmoqda. Ular orasida taniqli va iste’dodli sportchilar, murabbiylar, fahriy mehmonlar bo‘ladi.
Tadbirga tashrif buyurgan mehmonlar sportchilarning ko‘rgazmali chiqishlari guvohiga aylanishlari mumkin. Shuningdek, sizni turli tanlovlar va esdalik sovg‘alari kutib turibdi.
