Bugun konkur bo‘yicha «FEI World Jumping Challenge» musobaqasi nihoyasiga yetdi. O‘zbekistonda ot sporti bo‘yicha bunday saviyadagi musobaqa ilk marotaba o‘tkazildi.
Hal qiluvchi bahslarda 10 nafar sportchi sovrinli o‘rinlar uchun kurash olib borishdi. Ular orasida ikki nafar hamyurtimiz ham bahslarga kirishgandi.
Chavandozlarimiz birinchi gitta xatolarsiz ishtirok etishdi. Ikkinchi gitta esa Saidamirxon Turg‘unboyev o‘z chiqishini xatosiz amalga oshirdi. Abdushukur Sobirjonov esa esa biroz omad yetishmadi va sakkiz jarima ochkosini «ishlab oldi».
Ikki konkur yakunlariga ko‘ra birinchi o‘rinni Isroil sportchisi Sternbax Nadav o‘zining «Aragon» laqabli oti bilan birgalikda qo‘lga kiritdi. Ikkinchi o‘rin esa «Ramiro» otida qatnashgan argentinalik Richard Kiyerkigardga nasib etdi. Bronza medaliga esa o‘zining «Ambassador» laqabli oti bilan qatnashgan Saidamirxon Turg‘unboyev ega chiqdi.
