Osiyo futbolining Angliya Premyer-ligasidagi eng yaxshi vakili va bosh to‘purari Son Xyun Min yelkasidan «katta tog‘» ag‘darildi.
Agar Janubiy Koreya olimpiya terma jamoasi Osiyo o‘yinlari-2018da oltin medal yutmaganida, u shu yilning o‘zida «Tottenxem» bilan xayrlashib, harbiy qismga yo‘l olardi...
*** Janubiy Koreya qonunchiligiga ko‘ra, mamlakatning mehnatga layoqatli barcha erkak fuqarolari 36 yoshga to‘lgunlaricha 2 yillik harbiy xizmatni o‘tashlari shart. To‘g‘ri, Son Xyun hozir 26 yoshda, ammo futbolchilarga nisbatan boshqacha mezon belgilangan. Ya’ni ular 36 emas, 28 yoshgacha askarlik burchini ado etishlari kerak.
*** Sportchilarga ma’lum imtiyozlar bor: xalqaro maydonda katta muvaffaqiyat qozonganlar va yirik turnirlarda mamlakat terma jamoasi bilan g‘olib chiqqanlar harbiy majburiyatdan ozod bo‘lishadi.
*** Armiya safiga jalb etilgan koreys futbolchilari harbiylar jamoalari - «Sanju Sanmu» va «Asan Mugunxva» klublarida o‘ynashlari mumkin. Bu jamoalarda qat’iy ichki tartibga amal qilinadi - barchasi armiya nizomiga o‘xshash. Agar futbolchi shu ikki jamoa talabiga javob bermasa, u holda xizmatni oddiy askar sifatida o‘taydi.
*** JCH-2014da Rossiya terma jamoasi darvozasiga gol urgan Li Kyun Xo o‘sha vaqt askar maqomida edi.
*** Son Xyun Min aslida 4 yil oldin harbiy xizmat majburiyatidan qutulishi mumkin edi. Biroq 2014 yili «Bayer» rahbariyati uni Osiyo o‘yinlariga yubormagandi. Eslatma, koreyslar o‘sha turnirda ham oltin medalga ega chiqishgan.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
