Xabar berib o‘tganimizdek, «Devis kubogi»da jahon ligasiga chiqish uchun pley-off bahslari boshlandi.
Ushbu bosqichda Petr Lebed boshchiligidagi O‘zbekiston terma jamoasi Buyuk Britaniya terma jamoasiga qarshi kurash olib bormoqda. To‘qnashuvning dastlabki kunida yakkalik bahslarida ikkita o‘yin o‘tkazildi.
Dastlabki o‘yinda O‘zbekistonning birinchi raketkasi Denis Istomin mezbonlarning uchinchi raqamli tennischisi Daniel Evansga qarshi kortga chiqdi. 4 soat 11 daqiqa davom etgan o‘yinda afsuski Denis 6:7, 6:4, 6:0, 4:6, 5:7 hisoblarida imkoniyatni boy berib qo‘ydi.
Ikkinchi uchrashuvda esa Jo‘rabek Karimov britaniyaliklar tarkibidagi birinchi raqamli tennischi Kameron Norriga qarshi o‘yin o‘tkazdi. 3 soat 45 daqiqa davom etgan bahsda Jo‘rabek sensasion tarzda 0:6, 5:7, 7:6, 6:2, 6:2 hisoblarida g‘alaba qozondi.
Shu tariqa Buyuk Britaniya va O‘zbekiston terma jamoalari o‘rtasidagi o‘yinlarning birinchi kunidan so‘ng hisob 1:1 ko‘rinishini olgan.
Bugun juftlik bahslari o‘tkaziladi. Unda Denis Istomin va Sanjar Fayziyev mezbonlar vakillari Dominik Inglot/Jeymi Marrey tandemiga qarshi kortga chiqadilar. Yana ikkita yakkalik uchrashuvlari ertaga bo‘lib o‘tadi.
