“Metallurg” futbol klubidagi eng asosiy masala futbol akademiyasi bilan bog‘liq. Klub rahbariyatining PFL ishchi guruhiga ma’lum qilishicha, ayni vaqtda Bekobod shahridagi 3 ta mavze akademiya qurilishi uchun taklif sifatida kiritilgan.

Taklif ijrosi PFL tomonidan nazorat qilib boriladi. Oktyabr oyida “Metallurg” futbol klubi o‘z akademiyasi aynan qaysi mavzeda qurilishi borasida xabar berishi kerak bo‘ladi. Shuningdek, 2019 yilgi klub smetasida akademiya harajatlari aniq ko‘rsatib qo‘yiladi.

Ayni vaqtda “Metallurg”da 10 ta yosh toifasida mashg‘ulotlar olib borayotgan futbol maktabi mavjud. Maktab tarbiyalanuvchilari formalar, to‘plar, inventarlar bilan ta’minlangan. Futbol akademiyasida esa 7 yosh toifasi — 11 yoshdan 17 yoshgacha bo‘lgan futbolchilar to‘p surishi kerak. Akademiya tarbiyalanuvchilariga biriktirilgan murabbiylar hamda akademiya uchun javobgar shaxs qanday lisenziyaga ega bo‘lishi borasidagi ma’lumot klub rahbariyatiga taqdim etildi.

Ma’lumki, futbol akademiyasini birdaniga bunyod etish qiyin masala. 2019 yilgi mavsumda o‘z akademiyasiga ega bo‘lgan klublar, mana shu akademiyani qanday moliyalashtirayotgani PFL va O‘FA nazoratida bo‘ladi. O‘z akademiyasi yo‘q bo‘lgan klublar esa shuncha mablag‘ni akademiya qurish uchun yo‘naltiradi.