Bugun Milliy olimpiya qo‘mitasida joriy yilning 6-13 oktyabr kunlari Indoneziyaning Jakarta shahrida bo‘lib o‘tadigan navbatdagi ParaOsiyo o‘yinlariga bag‘ishlangan tadbir tashkil etildi. Mazkur musobaqa oldidan Milliy olimpiya qo‘mitasi, Milliy paralimpiya assosiasiyasi va O‘zbekiston Respublikasi maktabgacha ta’lim vazirligi hamkorligida ijtimoiy videorolik tayyorlandi. Bugun ushbu videomahsulotning taqdimot marosimi o‘tkazildi.
Tadbirda Milliy olimpiya qo‘mitasi, O‘zbekiston Respublikasi maktabgacha ta’lim vazirligi, Milliy paralimpiya assosiasiyasi vakillari, videoklip ssenariy muallifi va rejisseri Lola Yo‘ldosheva boshchiligidagi ijodiy guruh, paralimpiya sportchilari hamda Ommaviy axborot vositalari xodimlari ishtirok etishdi.
Klip namoyishi oldidan taniqli qo‘shiqchi va rejisser, estradamizning yorqin yulduzlaridan biri Lola so‘z olib, shunday dedi:
“Milliy olimpiya qo‘mitasi, Paralimpiya assosiasiyasi va maktabgacha ta’lim vazirligidan ushbu loyihani amalga oshirish bo‘yicha taklif tushgach, ikkilanmasdan uni qabul qildim. Chunki bu men uchun yangi chorlov, o‘ziga hos chaqiriq edi. Men klipda zamonaviy superqahramonlarni, barcha qiyinchiliklarga bardosh bera oladigan, irodasi mustahkam insonlarni aks ettirishni hohladim. Loyihada Ra’no Shodiyevani hisobga olmaganda birorta professional akterlar xizmatidan foydalanmadik. Aksincha O‘zbekiston paralimpiya terma jamoasi sportchilarini tasvirga olish ishlariga jalb qildik. Ular chindan ham qahramonlar. Bugun ushbu klipni tomosha qilib bunga o‘zingiz ham amin bo‘lasiz. Ularda nihoyatda mustahkam iroda, sabr-bardosh, xayotga bo‘lgan ishonch va umid mujassam. Men biz bilan ushbu loyiha ustida ishlagan barcha-barchaga o‘z minnatdorchiligimni izhor qilaman. Uylaymanki “Bir jamoa” loyihasi muhlislarga manzur keladi”.
Loyihada aytib o‘tganimizdek, paralimpiyachi sportchilar, nufuzli xalqaro turnirlar g‘oliblari qatnashishgan. Ular videomahsulot davomida o‘z harakatlari bilan har qanday qiyinchilikni yengib o‘tish mumkinligi va muvaffaqiyatga yetaklovchi yo‘l og‘ir ammo sharafli ekanligini namoyish etib berishadi. Ta’kidlash lozimki, mazkur ijtimoiy loyiha qo‘pgina paralimpiya sportchilari, imkoniyati cheklangan insonlar uchun yaxshigina motivasion xarakterga ega va yaqinda start oladigan ParaOsiyo o‘yinlarida paralimpiyachilarimiz kuchiga kuch, g‘ayratiga g‘ayrat qo‘shib, ularni yangidan yangi g‘alabalar sari chorlashi shubhasiz.
