Yangi formatda o‘tkazilayotgan O‘zbekiston kubogi bahslariga bo‘lgan qiziqish juda yuqori bo‘lmoqda.
Xususan, bugungi o‘yinga bo‘lgan e’tibor ham yuqori edi. Buni yaxshi anglab yetgan qo‘qo‘onliklar uchrashuvni shiddatli hujumlar ostida boshlashdi. Mezbonlar 2-daqiqada hisobni ochishlari mumkin edi. Jasur Hakimov qulay imkoniyatdan foydalana olmadi. Uning yaqin masofadan bergan zarbasi biroz noaniq ko‘rinish oldi. 7-daqiqada Yana bir hujumimiz xavfli ko‘rinish oldi. Xolmuhammedov-Ro‘ziyev-Hakimov kombinasiyasidan so‘ng, Jasurning zarbasiga ozgina aniqlik yetishmadi. 17-daqiqada mezbonlar hisobni ochishdi. Burchak to‘pidan keyin raqib jarima maydonchasi ichida pala-partishlik vujudga keldi. Undan foydalangan Suhrob Berdiyev raqib darvozasini ishg‘ol etdi. 41-daqiqada hisobni oshirish uchun yaxshi imkoniyatga ega bo‘ldik. Biroq zarbaga ozgina aniqlik yetishmadi. To‘p raqib darvozasining tashqi tomoniga tegdi.
Birinchi bo‘lim shu tariqa yakuniga yetdi.
Ikkinchi bo‘limni ham qo‘qonliklar hujumkor ruhda boshlashdi. Ana shunday hujumlarining birida raqib darvozaboniga omad kulib boqdi. 51-daqiqada Javohir Sidiqovning zargarona to‘p uzatishidan keyin Jasur Hakimov raqib darvozaboni bilan birga-bir vaziyatga chiqib bordi. Biroq to‘pni o‘zida ko‘proq saqlab qolgani bois imkoniyatni yo‘qqa chiqardi.
64-daqiqada zaxiradan maydonga tushgan Muhammadanas Hasanovning kuchli zarbasiga biroz aniqlik yetishmadi.
Bo‘lim o‘rtalariga kelib, mehmonlarda golga toradigan bir qator vaziyatlar bo‘ldi.
79-daqiqa o‘tib borayotgan pallada futbolchilarimiz ijrosidagi ajoyib kombinasiyani Suhrob Berdiyev gol bilan yakunladi. Uning ayyorona tarzda bergan zarbasi oldida raqib posboni ojiz qoldi.
Taymning qolgan daqiqalarida tomonlar shiddatli hujumlarni tashkil etishdi. Biroq ulardan foydalana olmaslik oqibatida tablodagi hisob o‘yin oxiriga qadar o‘zgarishsiz qoldi.
Shu tariqa, "Qo‘qon-1912" O‘zbekiston Kubogi yarim finalga yo‘llanma olishdi.
Aytgancha, ushbu jamoalar 22 sentyabr kuni Superliga doirasida Navoiyda bahs olib borishadi.
O‘zbekiston kubogi
1/4 final
“Qo‘qon-1912” – “Qizilqum” – 2:0 (1:0)
Hakamlar: Olim Tolibjonov, Sherzod Qamarov, Sardor Hakimov, Temur To‘xtasinov.
Nazoratchi: Igor Nexochin.
Komissar: Bahodir Mirzayev
Gollar: Suhrob Berdiyev – 17, 79.
“Qo‘qon-1912”: 1. O‘tkir Yusupov, 4. Bahodir Akramov, 5. G‘iyos Komilov, 10. Javohir Sidiqov (78. Bexruz Sa’dilloyev – 88), 15. Oybek Rustamov (55. Darko Gojkovich – 85), 17. Quvondiq Ro‘ziyev (38. Doston Meliqo‘ziyev – 85), 19. Suhrob Berdiyev (11. Firdavs Asadov – 82), 22. Murod Xolmuhammedov, 23. Aleksandr Merzlyakov, 65. Marko Milich, 70. Jasur Hakimov (96. Muhammadanas Hasanov – 64).
Zaxira: 71. Sarvar Karimov, 79. Iqbol Malikjonov.
“Qizilqum”: 1. Erkin Jabborov, 5. Georgi Kvesiashvili, 10. Alisher Sanoyev (23. Sherali Jo‘rayev – 56), 14. Fayzulla Qambarov, 17. Artur Gevorkyan (8. Akmal Rustamov - 31), 21. Muhsin Ubaydullayev (18. Samandar Shodmonov – 87), 30. Elguja Grigalashvili, 44. Mirjalol Qosimov, 50. Eldor Boymatov, 84. Nemanya Yovanovich (9. Xumoyun Abduolimov – 59), 91. Salim Mustafoyev (11. Doniyor Usmonov – 81).
Zaxira: 77. Yevgeniy Cheremisin, 88. Ivan Nagayev, 98. Bekzod G‘anijonov.
