Avvalroq “Stadion.uz” internet nashri aralash qoidalar jangchisi (MMA) xalqaro musobaqalar g‘olibi shahrixonlik Otabek Aliyev pichoqbozlik oqibatida o‘ldirilgani haqida xabar bergan edi.

Sportchining vafotidan bir hafta o‘tib, “Turon24” nashri muxbiri ushbu gap-so‘zlarga oydinlik kiritish maqsadida Shahrixon tumani Ichki ishlar bo‘limi bilan bog‘landi.

Ma’lum bo‘lishicha, hodisa shu yilning 18 sentyabr kuni sodir bo‘lgan. Otabek A.A. bilan bir kun avval janjallashishib, mushtlashadi. Ertasi kuni ular ko‘chada yana ko‘rishib qoladi.

So‘ng orani ochdi qilish maqsadida Otabekning “Sobalt”iga o‘tirib tumandagi “Saidxon farovonligi” MCHJ qoshidagi avtotransport vositalariga metan-gaz quyish shoxobchasiga borishadi.

“Orani ochdi qilish haqoratga ulanib, shu paytda A.A. yonida bo‘lgan bir dona xo‘jalik pichog‘i bilan qasddan Otabek Aliyevning qorin qismiga bir marotaba urib, uning hayoti uchun xavfli bo‘lgan og‘ir shikast yetkazadi.

Otabek Aliyev og‘ir tan jarohati olib, 19 sentyabr kuni shifoxonada vafot etadi. O‘sha kunning o‘zida tuman IIB tomonidan A.A.ga nisbatan Jinoyat kodeksining 104-moddasi 3-qismi “d” bandi bilan jinoyat ishi qo‘zg‘atildi. Tergov jarayonlari davom etmoqda”, deydi Tuman IIB boshlig‘i o‘rinbosari, tergov bo‘limi boshlig‘i Anvarjon Iminov.

Jinoyat kodeksining 104-moddasi 3-qismi “d” bandi (“jabrlanuvchining o‘lishiga sabab bo‘lgan qasddan badanga og‘ir shikast yetkazish”) bo‘yicha aybdor deb topilgan shaxs 8 yildan 10 yilgacha ozodlikdan mahrum qilish bilan jazolanadi.