Bugun, 26 sentyabr kuni poytaxtimizda joylashgan «Universal» sport saroyining majlislar zalida O‘zbekiston karate Milliy federasiyasining navbatdan tashqari konferensiyasi o‘tkazildi.

Unda O‘zbekiston Milliy olimpiya qo‘mitasi, Jismoniy tarbiya va sport vazirligi, Adliya vazirligi vakillari, federasiya Ijroiya qo‘mitasi a’zolari, viloyat federasiyalari rahbarlari, hakamlar, murabbiylar, terma jamoa a’zolari ishtirok etishdi, deb xabar qilmoqda O‘zbekiston karate Milliy federasiyasi matbuot xizmati.

Kun tartibidan viloyat federasiya rahbarlari, O‘KMF bosh hakami va terma jamoalar murabbiylaridan kelib tushgan murojaat va arizalarni ko‘rib chiqish, shuningdek, tashkilotga yangi rahbar saylash masalalari o‘rin olgandi.

Yig‘ilish davomida federasiyada yuzaga kelgan bir qator masalalar ko‘rib chiqildi, muhokama qilindi.

Shundan so‘ng O‘zbekiston karate Milliy federasiyasi raisi lavozimiga Alamjon To‘xtasinovich Mullayev nomzodi ilgari surildi. Konferensiya ishtirokchilari esa ko‘rsatilgan nomzodni qo‘llab-quvvatlashdi. Shu tariqa, Alamjon Mullayev tashkilotning yangi rahbariga aylandi.