Xabar berib o‘tganimizdek, Olimpiya o‘yinlari chempioni, bugungi kunda prof ringda faoliyatini davom ettirayotgan hamyurtimiz Fazliddin G‘oibnazarov 20 oktyabr kuni AQSHning Las-Vegas shahrida o‘zining navbatdagi jangini o‘tkazadi. O‘sha kuni unga mezbon bokschi Uilbert Lopes raqiblik qiladi.

Ma’lumot uchun, Fazliddin shu kungacha professional boksda beshta jang o‘tkazib, ularning barchasida g‘alaba qozongan. Ikkita g‘alabani muddatidan oldin qo‘lga kiritgan. Tajribali Lopes esa 34ta jang o‘tkazib, ularning 23tasida g‘alabaga erishgan. (15tasida nokaut evaziga). To‘qqiz marotaba mag‘lubiyatga uchragan (1 marotaba nokaut bo‘lgan).

Milliy olimpiya qo‘mitasi Matbuot va Media departamenti bokschimiz bilan bog‘lanib, ushbu jangga tayyorgarlik qanday ketayotgani bilan qiziqdi.

«Navbatdagi raqibim professional ringda yaxshigina tajribaga ega. Chapaqay. Men har bir raqibga qarshi alohida tayyorgarlik olib boraman. To‘qnash keladigan raqibimni o‘rganmay ringga chiqmayman.

Tayyorgarlikni uning chapaqayligini hisobga olgan holda olib boryapmiz. Mashg‘ulot zallarini ham shunga qarab o‘zgartirib turibmiz. Tajribali chapaqay bokschilar bilan sparring janglar o‘tkazdim. Bir so‘z bilan aytganda, tayyorgarlik raqibni to‘liq o‘rganishga qaratilgan.

O‘ylaymanki, bu menga asqotadi. 20 oktyabr kuni tomoshabop jang o‘tkazib, g‘alabaga erishmoqchiman», – dedi bokschimiz.

Milliy olimpiya qo‘mitasi navbatdagi jangda bokschimizga omad tilab qoladi.