O‘zbekistonlik 23 yoshli Elnur Abduraimov bugun AQSHda professional boksdagi birinchi jangini amerikalik Aron Jamil Xollisga qarshi o‘tkazib, raqibini nokautga uchratgan holda ilk g‘alabasini nishonladi. Bu haqda “Turon24” nashri xabar berdi.
Xabarda aytilishicha, Xollis bugun faoliyatidagi 12 jangida ringga ko‘tarildi va sakkizinchi mag‘lubiyatini qabul qilib oldi. Elnur amerikalik 30 yoshli bokschini nokautga uchratgan beshinchi sportchiga aylandi. Shuningdek, 30 yoshli Aron prof ringga 2014 yil qadam qo‘ygan va janglarining to‘rttasida g‘alabaga erishgan (2 tasi nokaut bilan) edi.
Ma’lumot o‘rnida, Elnur Abduraimov shu paytgacha havaskor boksda faoliyat olib borgan. 2015 yil Dohada o‘tkazilgan jahon chempionatida bronza medalini qo‘lga kiritgan. Bangkok va Toshkentda o‘tkazilgan Osiyo chempionatlarida esa bronza hamda oltin medallariga ega chiqqan edi.
