Ўзбекистонлик 23 ёшли Элнур Абдураимов бугун АҚШда профессионал боксдаги биринчи жангини америкалик Арон Жамил Холлисга қарши ўтказиб, рақибини нокаутга учратган ҳолда илк ғалабасини нишонлади. Бу ҳақда “Турон24” нашри хабар берди.
Хабарда айтилишича, Холлис бугун фаолиятидаги 12 жангида рингга кўтарилди ва саккизинчи мағлубиятини қабул қилиб олди. Элнур америкалик 30 ёшли боксчини нокаутга учратган бешинчи спортчига айланди. Шунингдек, 30 ёшли Арон проф рингга 2014 йил қадам қўйган ва жангларининг тўрттасида ғалабага эришган (2 таси нокаут билан) эди.
Маълумот ўрнида, Элнур Абдураимов шу пайтгача ҳаваскор боксда фаолият олиб борган. 2015 йил Доҳада ўтказилган жаҳон чемпионатида бронза медалини қўлга киритган. Бангкок ва Тошкентда ўтказилган Осиё чемпионатларида эса бронза ҳамда олтин медалларига эга чиққан эди.
