O‘zbekiston Superligasi 25-turidan o‘rin olgan “Paxtakor” va “Metallurg” uchrashuvida Bekobotliklar darvozasiga ikkita to‘p kiritgan Igor Sergeev bellashuv xususida to‘xtalib o‘tdi.
- Yaratganga shukr, ikkita gol urdim. Ko‘proq to‘p kiritishim ham mumkin edi. Birinchi bo‘lim qiyinroq kechdi. Hamisha katta tanaffusdan oldin o‘ynash og‘ir kechadi. Shunga doim e’tibor qilaman. Vaziyatlardan foydalandik. O‘yindan ijobiy taassurotlar qoldi.
Yangi jamoaga kelganim yo‘q, shu sababli ko‘nikish jarayoni bo‘lgani yo‘q. Shunchaki “Paxtakor”ga, qadrdon joyimga qaytdim. O‘sha o‘yinchilar, o‘sha jamoa. Ba’zi yangi futbolchilar bor.
Hozir birdan katta gapira olmayman. Lekin chempionlik uchun ham, kubok uchun ham borimizni beramiz. Boshqa jamoalarda maqsadlar qandayligini bilmayman, ammo “Paxtakor” oldiga doim ulkan vazifalar qo‘yiladi. Boshqa vazifaning o‘zi yo‘q.
