Xabaringiz bor, 6-18 oktyabr kunlari Buenos-Ayresda III yozgi o‘smirlar Olimpiya o‘yinlari bo‘lib o‘tadi. Nufuzli musobaqada O‘zbekiston sharafini sportning 16 turida 37 nafar sportchi himoya qiladi.

Bugun delegasiyamizning asosiy qismi o‘yinlar o‘tkaziladigan Buenos-Ayres shahriga yetib bordi. «Ezeiza International» xalqaro aeroportida vakillarimizni Milliy olimpiya qo‘mitasining ishchi guruhi a’zolari kutib olishdi.

Ma’lumot uchun, III yozgi o‘smirlar Olimpiadasida jahonning 206 mamlakatidan 15-18 yoshdagi 3926 nafar sportchi ishtirok etadi. 32 sport turida bahslar tashkil qilinadi. O‘yinlarda ilk marotaba ishtirokchi o‘g‘il-qizlar soni mutanosibligi vujudga kelgan (1963 nafardan).

Eslatib o‘tamiz, o‘smirlar Olimpiya o‘yinlarning tantanali ochilish marosimi 6 oktyabr (Toshkentda 7 oktyabr tongi) kuni bo‘lib o‘tadi.