Farg‘onaning “Istiqlol” klubi futbolchisi Obid Jo‘raboyev Pro-liga 28-turidan o‘rin olgan “Sho‘rtan”ga (0:1) qarshi kechgan uchrashuvdan so‘ng o‘yin haqidagi fikrlarini bildirib o‘tdi.
“Bugungi o‘yinni sobiq jamoam “Sho‘rtan”ga qarshi o‘tkazdik. Men bu jamoa safida 4-yil to‘p surganman. Hozirda “Istiqlol” jamoasida o‘ynayotganimdan xursandman.
To‘g‘risini aytsam, bugungi o‘yin oson bo‘lmadi. Birinchi bo‘limda ustunlik biz tomonda bo‘ldi. Ko‘plab vaziyatlar yaratdik. Ikkinchi bo‘limda esa mezbonlar yaxshi harakat qilishdi.
Uzoq yo‘l bosib kelganimizgami ikkinchi bo‘limda sustroq harakat qildik. Bu uchrashuvda omad biz tomonga kulib boqdi.
Bizda ahil jamoa yig‘ilgan. “Istiqlol” nafaqat bu o‘yinda barcha uchrashuvlarda g‘alaba qozonishni istaydi. Bizning yagona maqsadimiz Superligaga chiqish”, deydi tajribali himoyachi.
Ma’lumot uchun, mazkur g‘alabadan so‘ng “Istiqlol” jamoasi Pro-liga turnir jadvalida 45 ochko bilan 3-o‘rinda bormoqda.
