"Real Madrid" klubi akademiyasi va O‘FA o‘rtasida tuzilgan kelishuvga asosan madridlik mutaxassislar tomonidan tanlab olingan 22 nafar bola Real Madrid Foundation Clinic dasturi bo‘yicha master klasslarda ishtirok etib, tajribalarini oshirish maqsadida Ispaniyaning Madrid shahriga jo‘nab ketgani haqida xabar bergan edik.
Ispaniyaga tashrifning so‘nggi kunida o‘zbekistonlik yosh futbolchilar “Real” klubi akademisining maydonida mashg‘ulotlarda ishtirok etdilar. Mashg‘ulotlar jarayoni nihoyasiga yetgach, 22 nafar bola 4 jamoaga bo‘lingan holda o‘zaro o‘yin o‘tkazishdi. O‘yinlar so‘ngida akademiya mutasaddilari bolalarga sertifikatlar hamda esdalik sovg‘alarini topshirishdi.
Shundan so‘ng, yosh futbolchilarga biriktirilgan mutasaddilar tomonidan ular uchun shaharning diqqatga sazovor joylariga sayohat tashkil qilindi. Toshkentdan tashrif buyurgan 6 nafar murabbiy esa “Real” akademiyasida mashg‘ulot o‘tkazayotgan jamoaning sobiq futbolchisi Xabi Alonsoning mashg‘ulot jarayonini kuzatishga muvaffaq bo‘ldilar.
Ispaniya safariga yo‘l olgan bolalar bugun, 6 oktyabr kuni Toshkentga qaytib keladilar. Kutib olish marosimi Islom Karimov nomidagi “Toshkent xalqaro aeroporti”da soat 20:45 da tashkil qilinadi.
