Argentinadagi o‘smirlar Olimpiya o‘yinlarining oltinchi kuni O‘zbekiston sport delegasiyasi uchun muvaffaqiyatli bo‘ldi.
Biroz avval og‘ir atletika bahslarida Kumushxon Fayzullayeva oltin medalga ega chiqqandi. Endi esa baydarka va kanoeda eshkak eshish bahslarida ishtirok etgan hamyurtimiz Islomjon Abdusalomov terma jamoamiz hisobiga kumush medalni qo‘shib qo‘ydi.
Kanoening yakkama-yakka bahslarida qatnashgan hamyurtimiz avvaliga saralash bahslarida muvaffaqiyatli ishtirok etdi. Keyin chorak finalda Vengriya, yarim finalda Chexiya vakillarini ortda qoldirdi. Hal qiluvchi bahsda esa qozog‘istonlik sportchiga qarshi kurash olib bordi va kichik farq bilan imkoniyatni boy berib, kumush medal bilan kifoyalandi.
Islomjon Abdusalomovning medali ushbu o‘yinlarda O‘zbekiston terma jamoasi uchun yettinchi medal hisoblanadi. Ayni paytda vakillarimiz hisobida 2ta oltin, 3ta kumush va 2ta bronza medallari mavjud.
