O‘zbekiston Professional futbol ligasi hamda Ispaniya La ligasining hamkorlik qilish bo‘yicha kelishuvga asosan Ispaniya Primerosida ishtirok etayotgan “Eybar” klubining U-15 jamoasi yurtimizga O‘zbekiston o‘smirlar terma jamoasi bilan o‘rtoqlik o‘yini o‘tkazish uchun tashrif buyurgani haqida xabar bergan edik.
“O‘zbekiston temir yo‘llari” sport stadionida tashkil etilgan o‘rtoqlik o‘yini nihoyasiga yetdi. O‘yin qiziqarli hamda murosasiz tarzda kechdi. Azamat Abduraimov boshchiligidagi o‘smirlar terma jamoasi uchrashuvni yirik hisobda o‘z foydasiga hal qildi.
Bahsda 5-0 hisobida o‘zbekistonlik futbolchilar g‘alaba qozonishdi. Uchrashuvda Sardor Hojiboyev 2 ta gol kiritib dubl qayd etgan bo‘lsa, Nodir Abdurazzoqov hamda Shaxzod Akramov, Jasur Ahmedovlar 1 martadan raqib darvozasini ishg‘ol qilishdi.
Eslatib o‘tamiz, O‘zbekiston o‘smirlar terma jamoasi noyabr oyida yana bir bor yig‘in o‘tkazadi.
O‘rtoqlik uchrashuvi
O‘zbekiston U-14 – Eybar U-15 – 5:0
Gollar: Sardor Hojiboyev (dubl), Nodir Abdurazzoqov, Shaxzod Akramov, Jasur Ahmedov
