“Manchester Yunayted” klubi sohiblari uni sotib olishni rejalashtirayotgan Saudiya Arabistoni valiahd shahzodasi Muhammad bin Salmonga rad javobini berishdi.
Bunga muholifat jurnalisti Jamol Qoshiqchining Istanbuldagi Saudiya Arabistoni konsulxonasida g‘oyib bo‘lgani va uning o‘limiga doir surishtiruvlar o‘tkazilayotgani sabab qilib ko‘rsatilmoqda.
Joze Mourinyo ustozlik qilayotgan klub shahzodaning ixtiyoriga o‘tishi borasida turli gap-so‘zlar ko‘paygandi. Shunga muvofiq, ayni paytda klub xo‘jayini bo‘lib turgan amerikalik Gleyzerlar oilasi u bilan muzokara o‘tkazishga hozirlik ko‘rayotgan edi.
Hattoki, Angliya matbuotida yaqin kunlarda Avraam Gleyzer Ar-Riyodda Muhammad bin Salmon bilan uchrashajagi ma’lum qilingandi. Gazetalarda yozilishicha, Saudiya Arabiston valiahd shahzodasi ingliz klubi uchun 4 milliard yevro berishga tayyor ekanligini bildirgan.
Istanbulda Jamol Qoshiqchining sirli tarzda yo‘qolishini saudiyaliklarga, xususan, shahzodaga bog‘lanayotganligi Gleyzerlarni ahdidan qaytardi. Gleyzerlar oilasi “Manchester Yunayted” sotilmaydi”, deya bayonot berishdi.
