“Манчестер Юнайтед” клуби соҳиблари  уни сотиб олишни режалаштираётган Саудия Арабистони валиаҳд шаҳзодаси Муҳаммад бин Салмонга рад жавобини беришди.

Бунга муҳолифат журналисти Жамол Қошиқчининг Истанбулдаги Саудия Арабистони консулхонасида ғойиб бўлгани ва унинг ўлимига доир суриштирувлар ўтказилаётгани сабаб қилиб кўрсатилмоқда.

Жозе Моуриньо устозлик қилаётган клуб шаҳзоданинг ихтиёрига ўтиши борасида турли гап-сўзлар кўпайганди. Шунга мувофиқ,  айни пайтда клуб хўжайини бўлиб турган америкалик Глейзерлар оиласи у билан музокара ўтказишга ҳозирлик кўраётган эди.

Ҳаттоки, Англия матбуотида яқин кунларда Авраам Глейзер Ар-Риёдда Муҳаммад бин Салмон билан учрашажаги маълум қилинганди. Газеталарда ёзилишича, Саудия Арабистон валиаҳд шаҳзодаси инглиз клуби учун 4 миллиард евро беришга тайёр эканлигини билдирган.

Истанбулда Жамол Қошиқчининг сирли тарзда йўқолишини саудияликларга, хусусан, шаҳзодага боғланаётганлиги Глейзерларни аҳдидан қайтарди. Глейзерлар оиласи “Манчестер Юнайтед” сотилмайди”, дея баёнот беришди.