O‘zbekistonlik hujumchi Sherzod Temirov Iroqning “Erbil” jamoasi bilan xayrlashdi. Futbolchi o‘zining Instagram sahifasida klubdan ketishini e’lon qilib, muxlislarga xayrlashuv maktubini yozdi.

“Barchaga rahmat. Bir yil davomida sizlar bilan bir jamoada to‘p tepganimdan juda baxtliman. Meni qo‘llab-quvvatlagan ‘Erbil’ klubi murabbiylar shtabi, prezidenti, rahbariyati va muxlislariga o‘z minnatdorchiligimni bildiraman. Barchangizni yaxshi ko‘raman”, deb yozadi Temirov.

Ma’lumot uchun, Temirov klub safida bir yil davomida barcha turnirlarda jami 34 ta uchrashuvda maydonga tushib, 29 ta gol urishga muvaffaq bo‘ldi. Hujumchi gollarining 28 tasini aynan ichki chempionatda kiritib, Iroq ligasining eng yaxshi to‘purariga aylandi. Uning jamoasi esa musobaqa yakunida bronza medallariga ega chiqdi.

Ayrim ma’lumotlarga ko‘ra, Sherzod Temirov O‘zbekiston Superligasidan qaytishi mumkin. Hujumchi katta ehtimol bilan Toshkentning “Paxtakor” klubi bilan shartnoma imzolaydi.

Eslatib o‘tamiz, Sherzod Temirov O‘zbekiston milliy terma jamoasining Shimoliy Amerikadagi Jahon chempionati uchun e’lon qilingan kengaytirilgan tarkibidan joy olgan. “Oq bo‘rilar” mundial oldidan so‘nggi tayyorgarlik bosqichini o‘tash uchun 26 may kuni Nyu Yorkka yo‘l oladi.